ദമ്മാം: സഊദിയില്‍ രണ്ടാനമ്മ ആറു വയസുമാത്രം പ്രായമുള്ള പെണ്‍കുട്ടിയെ കഴുത്തറുത്തു കൊന്നു. കിഴക്കന്‍ പ്രവിശ്യയിലാണ് ക്രൂരമായ കൊലപാതകം അരങ്ങേറിയത്. റീം അല്‍ റാഷിദി എന്ന കുട്ടിയെയാണ് തന്റെ പിതാവിന്റെ രണ്ടാം ഭാര്യ കൊലപ്പെടുത്തിയത്.


രാവിലെ അല്‍ അഹ്‌സയിലെ സ്‌കൂളില്‍ പോയ കുട്ടിയെ രണ്ട് പിരിയഡുകള്‍ക്ക് ശേഷം രണ്ടാനമ്മയായ സ്ത്രീ വിളിച്ചിറക്കി കൊണ്ട് വരികയായിരുന്നു.


തുടര്‍ന്ന് ആള്‍പ്പാര്‍പ്പില്ലാത്ത പ്രദേശത്തേക്ക് കുട്ടിയുമായി പോകുകയും കൈവശം കരുതിയിരുന്ന കത്തി ഉപയോഗിച്ച് കുട്ടിയുടെ കഴുത്തറുത്ത് കൊല്ലുകയുമായിരുന്നു. കൃത്യം കണ്ടു പ്രദേശത്ത് വന്ന ഒരാള്‍ സ്ത്രീയെ പിടികൂടാന്‍ ശ്രമിച്ചെങ്കിലും അവര്‍ ഓടി രക്ഷപ്പെടുകയായിരുന്നു.


തുടര്‍ന്ന് പോലീസില്‍ വിവരമറിയിക്കുകയും പോലീസ് വീട്ടിലെത്തി പ്രതിയെ കയ്യോടെ അറസ്റ്റ് ചെയ്യുകയും ചെയ്തു. 30 വയസ്സുകാരിയായ കൊലയാളിയായ യുവതിയെ തുടരന്വേഷണത്തിനായി പ്രോസിക്യൂഷന് കൈമാറി.