കണ്ണൂര്‍: കരാറുണ്ടാക്കാത്ത കോളജുകള്‍ക്കെതിരെ ഹൈക്കോടതിയെ സമീപിക്കുമെന്ന് മുഖ്യമന്ത്രി പിണറായി വിജയന്‍. സുപ്രിംകോടതി സര്‍ക്കാരിന്റെ ഹരജി  തള്ളിയ പശ്ചാത്തലത്തിലാണ് മുഖ്യമന്ത്രിയുടെ പ്രതികരണം. കരാറുണ്ടാക്കാത്ത കോളജുകള്‍ അമിത ഫീസ് വാങ്ങുന്നതിനെതിരെയാണ് ഹൈക്കോടതിയെ സമീപിക്കുന്നതെന്ന് മുഖ്യമന്ത്രി പറഞ്ഞു.

സ്വാശ്രയ കേസില്‍ സംസ്ഥാന സര്‍ക്കാരിന് സുപ്രിംകോടതിയില്‍ നിന്ന് തിരിച്ചടിയാണുണ്ടായത്. ഉയര്‍ന്ന ഫീസില്‍ പ്രവേശനം നടത്താന്‍ കണ്ണൂര്‍, കരുണ, കെഎംസിടി മെഡിക്കല്‍ കോളജുകള്‍ക്ക് ഹൈക്കോടതി നല്‍കിയ അനുമതി റദ്ദാക്കണമെന്നാവശ്യപ്പെട്ട് സംസ്ഥാന സര്‍ക്കാര്‍ നല്‍കിയ ഹരജി  സുപ്രീം കോടതി തള്ളിയത്.

ഫീസ് തര്‍ക്കത്തില്‍ ഹൈക്കോടതി തീരുമാനമെടുക്കട്ടെയെന്ന് നിര്‍ദേശിച്ച കോടതി, വെള്ളിയാഴ്ച വൈകുന്നേരത്തോടെ അഡ്മിഷന്‍ അവസാനിക്കുമെന്നതിനാല്‍ ഒന്നും ചെയ്യാനാകില്ലെന്നും വ്യക്തമാക്കി.

പ്രവേശന കൗണ്‍സിലിങ് പൂര്‍ത്തിയാക്കേണ്ട അവസാന ദിവസം ഇന്നാണെന്നും രണ്ട് കോളജുകളിലേയും പ്രവേശന നടപടികള്‍ പൂര്‍ത്തിയാക്കി ക്ലാസുകള്‍ ആരംഭിച്ചെന്നും മാനേജുമെന്റുകള്‍ക്ക് വേണ്ടി ഹാജരായ അഭിഭാഷകര്‍ കോടതിയെ അറിയിച്ചു. ഇക്കാര്യം അംഗീകരിച്ചാണ് വൈകിയ വേളയില്‍ വിഷയത്തില്‍ ഇടപെടാനാകില്ലെന്ന്  ജസ്റ്റിസ് ദീപക് മിശ്ര അധ്യക്ഷനായ ബെഞ്ച് പറഞ്ഞത്.

കണ്ണൂര്‍ മെഡിക്കല്‍ കോളജിന് 10 ലക്ഷവും കരുണ മെഡിക്കല്‍ കോളജിന് 7.45 ലക്ഷം രൂപയും വാര്‍ഷിക ഫീസായി ഈടാക്കാനാണ് ഹൈക്കോടതി അനുമതി നല്‍കിയത്.