കോഴിക്കോട്: ആറാമത് സംസ്ഥാന മാസ്റ്റേഴ്‌സ് അക്വാട്ടിക് ചാംപ്യന്‍ഷിപ്പ് ഇന്നും നാളെയുമായി നടക്കാവ് സ്‌പോര്‍ട്‌സ് കൗണ്‍സില്‍ സ്വിമ്മിങ്പൂളില്‍ നടക്കും. 25 വയസ് മുതല്‍ മുകളിലോട്ട് ഓരോ അഞ്ചു വയസിനും പുരുഷന്മാര്‍ക്കും സ്ത്രീകള്‍ക്കും പ്രത്യേക മത്സരമുണ്ടാകും. 12 വിഭാഗങ്ങളിലായി മുന്‍ സംസ്ഥാന ചാംപ്യന്മാരുള്‍പ്പെടെ അഞ്ഞൂറോളം നീന്തല്‍ താരങ്ങള്‍ പങ്കെടുക്കും. പരിപാടിയുടെ ഉദ്ഘാടനം ഇന്ന് ഉച്ചയ്ക്ക് 2.30ന് എ. പ്രദീപ് കുമാര്‍ എം.എല്‍.എ ഉദ്ഘാടനം ചെയ്യും. തുടര്‍ന്ന് കുട്ടികളും മുതിര്‍ന്നവരും ചേര്‍ന്ന് അവതരിപ്പിക്കുന്ന അരമണിക്കൂര്‍ നീണ്ടുനില്‍ക്കുന്ന ജലയോഗയുടെ പ്രദര്‍ശനവുമുണ്ടാകും. നാളെ നടക്കുന്ന സമാപന സമ്മേളനം ടി.പി ദാസന്‍ ഉദ്ഘാടനം ചെയ്യും. വാര്‍ത്താസമ്മേളനത്തില്‍ ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് കെ.ജെ മത്തായി, ജനറല്‍ കണ്‍വീനര്‍ സി.സി ജോളി, ഡോ. റോയ് ജോണ്‍ പങ്കെടുത്തു.