വാഷിങ്ടണ്‍: സാംസങിനെതിരെ നല്‍കിയ പേറ്റന്റ് ലംഘന കേസില്‍ ഒടുവില്‍ ആപ്പിളിനു തന്നെ വിജയം. 120 കോടി യു.എസ് ഡോളര്‍ (ഏകദേശം 800 കോടി) നല്‍കണമെന്ന കോടതിയുടെ ഉത്തരവിനെതിരെ നേരത്തെ സാംസങ് അപ്പീല്‍ നല്‍കിയിരുന്നു. എന്നാല്‍ ആപ്പിളിനു അനുകൂലമായാണ് അപ്പീല്‍ വിധിയും വന്നത്.

ലോകത്തെ പ്രമുഖ സ്മാര്‍ട്ട്‌ഫോണ്‍ നിര്‍മാതാക്കളായ ആപ്പിളും സാംസങും പേറ്റന്റിനെച്ചൊല്ലി നിരന്തരം തര്‍ക്കത്തിലാണ്. 'സ്ലൈഡ് ടു അണ്‍ലോക്ക്' സംവിധാനത്തിന്റെ പേരിലാണ് ഇപ്പോള്‍ വിധി വന്നിരിക്കുന്ന കേസിലെ തര്‍ക്കം.

ഇത് ഐ ഫോണില്‍ നിന്ന് കോപ്പിയടിച്ചാണ് സാംസങ് നല്‍കിയതെന്നാണ് ആപ്പിളിന്റെ വാദം. എന്നാല്‍ ഈ സംവിധാനത്തിന്റെ പേറ്റന്റിനു മേല്‍ നിമയസാധുതയില്ലെന്നാണ് സാംസങ് വാദിച്ചത്. ഇതു തെളിയിക്കാന്‍ സാംസങിനായില്ല.

ഫെബ്രുവരിയിലാണ് കേസില്‍ നഷ്ടപരിഹാരം നല്‍കാന്‍ വിധി വന്നത്. ലോക്കിങ് സിസ്റ്റടക്കം നിരവധി ഫീച്ചറുകള്‍ സാംസങ് മോഷ്ടിച്ചിട്ടുണ്ടെന്നും 15,000 കോടി രൂപ നഷ്ടപരിഹാരം നല്‍കണമെന്നുമായിരുന്നു വിചാരണയില്‍ ആപ്പിള്‍ ആവശ്യപ്പെട്ടത്.