അരീക്കോട്: ലോകം നാളെ മാനസികാരോഗ്യ ദിനമായി ആചരിക്കുമ്പോള്‍ വേറിട്ട പ്രവര്‍ത്തനങ്ങളുമായി മാനസിക രോഗികള്‍ക്ക് സാന്ത്വനമാവുകയാണ് ഒരുകൂട്ടം എന്‍.എസ്.എസ് വളണ്ടിയര്‍മാര്‍. മൂര്‍ക്കനാട് സുബുലുസ്സലാം ഹയര്‍സെക്കന്‍ഡറി സ്‌കൂളിലെ എന്‍.എസ്.എസ് വളണ്ടിയര്‍മാരാണ് ഇന്ന് കോഴിക്കോട് കുതിരവട്ടം മാനസിക കേന്ദ്രത്തിലെത്തി രോഗികളുടെ കൂട്ടുകാരാവുന്നത്. രാവിലെ ഒന്‍പതിന് എത്തി വൈകീട്ട് അഞ്ചുവരെ രോഗികള്‍ക്കൊപ്പം ചെലവഴിക്കും.
പൂന്തോട്ട നിര്‍മാണം, എല്‍.ഇ.ഡി ബള്‍ബ് നിര്‍മാണ പരിശീലനം, സംഗീത സാന്ത്വന പരിപാടി തുടങ്ങിയ പരിപാടികള്‍ ഒരുക്കിയിട്ടുള്ളത്. കൈതപ്രം ദാമോദരന്‍ നമ്പൂതിരിയുടെ സ്വാതിതിരുന്നാള്‍ മ്യൂസിക് തെറാപ്പി ഫൗണ്ടേഷന്റെ സഹകരണത്തോടെ മ്യൂസിക് തെറാപ്പി സംഘടിപ്പിക്കും.  കൈതപ്രം ദാമോദരന്‍ നമ്പൂതിരിയും ഡോ. എം.കെ മുനീര്‍ എം.എല്‍.എയും പരിപാടിയില്‍ പങ്കെടുക്കും.
കോഴിക്കോട് കോര്‍പ്പറേഷന്‍ ഡെപ്പ്യൂട്ടി മേയര്‍ മീര ദര്‍ശക്, ഊര്‍ങ്ങാട്ടിരി പഞ്ചായത്ത് പ്രസിഡന്റ് എന്‍.കെ ഷൗക്കത്തലി, ഡോ. രാജേന്ദ്രന്‍, പ്രിന്‍സിപ്പല്‍ കെ. അബ്ദുറസാഖ്, പ്രോഗ്രാം ഓഫീസര്‍ എം. കൃഷ്ണനുണ്ണി തുടങ്ങിയ പ്രമുഖര്‍ പരിപാടിയില്‍ സംഗമിക്കും.