മുക്കം: സ്വാശ്രയ മെഡിക്കല്‍ പ്രവേശനത്തിന് വന്‍ തുക തലവരിപ്പണം വാങ്ങുന്നതായി ആരോപിച്ച് കെ.എം.സി.ടി മെഡിക്കല്‍ കോളജിലേക്ക് എസ്.എഫ്.ഐ,ഡി.വൈ.എഫ്.ഐ പ്രവര്‍ത്തകര്‍ നടത്തിയ മാര്‍ച്ചില്‍ സംഘര്‍ഷം.
ഇന്നലെ വൈകുന്നേരം 5.30 ഓടെയാണ് മണാശ്ശേരി അങ്ങാടിയില്‍ നിന്ന് മാര്‍ച്ച് ആരംഭിച്ചത്.  കോളജ് പരിസരത്ത് മാര്‍ച്ച് പൊലീസ് തടഞ്ഞതോടെയാണ് സംഘര്‍ഷമുണ്ടായത്. സംഘര്‍ഷത്തില്‍ മുക്കം എസ്.ഐ സനല്‍രാജിന് പരുക്കേറ്റു.
കൊടുവള്ളി സി.ഐ ബിശ്വാസ്, താമരശ്ശേരി സി.ഐ അഗസ്റ്റിന്‍, മുക്കം എസ്.ഐ സനല്‍രാജ്, തിരുവമ്പാടി എസ്.ഐ ശംഭുനാഥ് എന്നിവരുടെ നേതൃത്വത്തിലാണ് മാര്‍ച്ച് തടഞ്ഞത്. സര്‍ക്കാരുമായി കരാറുണ്ടാക്കാതെ കോഴ വാങ്ങി നിയമനം നടത്താന്‍ മാനേജ്‌മെന്റിനെ അനുവദിക്കില്ലന്ന് സമരക്കാര്‍ പറഞ്ഞു. മാര്‍ച്ച് ഡി.വൈ.എഫ്.ഐ സംസ്ഥാന കമ്മിറ്റി അംഗം വി. വസിഫ് ഉദ്ഘാടനം ചെയ്തു. അരുണ്‍ കൂടരഞ്ഞി അധ്യക്ഷനായി.