കൊയിലാണ്ടി: കൊല്ലം-പാറപ്പള്ളി മഖാമിലേക്കുള്ള ബസ് സര്‍വിസ് മുടങ്ങുന്നതായി പരാതി. പ്രതിദിനം നൂറുകണക്കിനു തീര്‍ഥാടകരും ടൂറിസ്റ്റുകളുമാണ് മഖാമിലേക്കും തീരദേശത്തേക്കും എത്തുന്നത്. ബസ് സര്‍വിസ് മുടങ്ങിയതിനാല്‍ ഇവര്‍ യാത്രാസൗകര്യമില്ലാതെ ബുദ്ധിമുട്ടുകയാണ്. ഇവിടേക്കു സര്‍വിസ് നടത്തുന്ന ദിനാര്‍ എന്ന ബസ് ഇടയ്ക്കിടെ സര്‍വിസ് മുടങ്ങുകയാണ്. അതിനിടെ തീര്‍ഥാടന കേന്ദ്രത്തിലേക്കു കൂടുതല്‍ ബസ് സര്‍വിസ് അനുവദിക്കണമെന്ന ആവശ്യവും ഉയരുന്നുണ്ട്. കൊയിലാണ്ടിയില്‍ നിന്നും അരയന്‍കാവ്, ജുമുഅത്ത് പള്ളി റോഡ്, പാറപ്പള്ളി, സ്വാമിയാര്‍കാവ്, പിഷാരികാവ്, കൊല്ലം എന്നിവിടങ്ങളിലൂടെ ടൗണിലെത്തി കൊയിലാണ്ടിയിലേക്കുള്ള ബസ് സര്‍വിസ്‌കൂടി ആരംഭിക്കണമെന്നാണ് ആവശ്യം. ചരിത്ര പ്രസിദ്ധമായ പാറപ്പള്ളി മഖാമിലേക്ക് ബസ് സര്‍വിസ് അനുവദിച്ച് യാത്രാസൗകര്യം വര്‍ധിപ്പിക്കണമെന്ന് എസ്.വൈ.എസ് കൊല്ലം ഏരിയാ കമ്മിറ്റി ആവശ്യപ്പെട്ടു.