തൃശൂര്‍: 16-ാമത് ടോംയാസ് പുരസ്‌കാരം ഉസ്താദ് ബിസ്മില്ലാഖാന് മരണാനന്തര ബഹുമതിയായി വാരണാസിയില്‍ സമ്മാനിച്ചു. അരലക്ഷം രൂപയും രൂപശില്‍പവുമാണ് അവാര്‍ഡ്. വാരണാസിയിലെ ഗംഗാ തീരത്തുള്ള ഭാരത രത്‌ന ഉസ്താദ് ബിസ്മില്ലാഖാന്‍ ഫൗണ്ടേഷനില്‍ നടന്ന ചടങ്ങില്‍ ട്രസ്റ്റ് ചെയര്‍മാന്‍ സയ്യിദ് അബ്ബാസ് മുര്‍ത്താസ ഷാംസി ടോംയാസ് മാനേജിംഗ് ഡയറക്ടര്‍ തോമസ് പാവറട്ടിയില്‍ നിന്നും അവാര്‍ഡ് സ്വീകരിച്ചു.
ഷെഹനായ് സംഗീതത്തിലൂടെ അന്തര്‍ദ്ദേശീയ പ്രസിദ്ധനായ ബിസ്മില്ലാഖാന്റെ 100-ാം ജന്മവാര്‍ഷികമായതുകൊണ്ടാണ് ഈ ബഹുമതി അദ്ദേഹത്തിന്റെ നാടായ വാരണാസിയില്‍ വെച്ച് നല്‍കിയത്. പ്രസിദ്ധ സ്വാതന്ത്ര്യസമരസേനാനിയും പത്രപ്രവര്‍ത്തകനുമായിരുന്ന വി.എ കേശവന്‍ നായരുടെ സ്മരണ നിലനിര്‍ത്തുന്നതിനുവേണ്ടി ടോംയാസ് അഡ്വര്‍ടൈസിംഗ് ഏര്‍പ്പെടുത്തിയിട്ടുള്ളതാണ് ഈ പുരസ്‌കാരം.
ഉസ്താദ് ബിസ്മില്ലാഖാന്റെ പുത്രന്‍ ഉസ്താദ് കാസിം ഖാന്‍, പ്രൊഫ. നാരായണ്‍ദാസ് ത്രിപാഠി, ഫാ. ആല്‍ഫ്രഡ് ഡിസൂസ, ജെയ്‌മോന്‍ മാത്യു മീന്‍പാറ, ഡോ. മുഹമ്മദ് യാസിന്‍ സംസാരിച്ചു.