കൊടുവള്ളി: സാമ്പത്തിക ഇടപാട് തര്‍ക്കവുമായി ബന്ധപ്പെട്ട് യുവാവിനെ തട്ടിക്കൊണ്ടുപോയി മര്‍ദിച്ച സംഭവത്തില്‍ രണ്ടു പേരെ കൊടുവള്ളി പൊലിസ് അറസ്റ്റു ചെയ്തു. ഓമശ്ശേരി പൂത്തൂര്‍ അമ്പലക്കണ്ടി ജാബിര്‍ (24)നെ മര്‍ദിച്ച സംഭവത്തിലാണ് കൊടുവള്ളി ചെറിയചോലക്കല്‍ ഷഫീഖ്(26), മാവൂര്‍ പുലപ്പാട് ഹൗസില്‍ നിസാര്‍(28) എന്നിവരെ അറസ്റ്റു ചെയ്തത്. ഇവര്‍ സഞ്ചരിച്ച കാറും പൊലിസ് കസ്റ്റഡിയിലെടുത്തു.
ഞായറാഴ്ച്ച രാവിലെ 11 മണിയോടെ അമ്പലക്കണ്ടി അങ്ങാടിയില്‍ നില്‍ക്കുകയായിരുന്ന ജാബിറിനെ കാറിലെത്തിയ സംഘം സൗഹൃദം നടിച്ച് കാറില്‍ കയറ്റിക്കൊണ്ടുപോവുകയായിരുന്നു. സംശയം തോന്നിയ നാട്ടുകാര്‍ കൊടുവള്ളി പൊലിസില്‍ വിവരം അറിയിക്കുകയും ഉച്ചയ്ക്ക് രണ്ടു മണിയോടെ ഇവരില്‍പ്പെട്ട രണ്ടു പേരെ കൊടുവള്ളി പഴയ പൊലിസ് സ്റ്റേഷന്‍ പരിസരത്ത് നിന്ന് പിടികൂടുകയുമായിരുന്നു. ഇവരെ താമരശ്ശേരി കോടതിയില്‍ ഹാജരാക്കി. സംഭവവുമായി ബന്ധപ്പെട്ട് ഒരാളെക്കൂടി പിടികൂടാനുണ്ടെന്ന് പൊലിസ് പറഞ്ഞു.