ഉഡുപ്പി: ബൈക്ക് തെന്നി വീണതിനെ തുടര്‍ന്ന് മസ്തിഷ്‌ക മരണം സംഭവിച്ച യുവാവിന്റെ അവയവങ്ങള്‍ ദാനം ചെയ്തു. ഇക്കഴിഞ്ഞ ശനിയാഴ്ച രാത്രി മണിപ്പാളിലെ മന്നപ്പള്ളിയില്‍ ഉണ്ടായ അപകടത്തില്‍ പരുക്കേറ്റ് മണിപ്പാള്‍ ആശുപത്രിയില്‍ ഗുരുതര നിലയില്‍ കഴിഞ്ഞു വന്നിരുന്ന ബൈന്തൂരിലെ ഡോ. രവിരാജിന്റെ മകന്‍ ഹിമന്‍ഷുവിന്റെ അവയവങ്ങളാണ് ദാനം ചെയ്തത്.

അപകടത്തില്‍ ഹിമന്‍ഷുവിന്റെ സുഹൃത്ത് ഹര്‍ഷിത് സംഭവ സ്ഥലത്ത് വച്ച് തന്നെ മരിച്ചിരുന്നു. ഇവര്‍ ബൈക്കില്‍ സഞ്ചരിച്ചു കൊണ്ടിരിക്കെ ബൈക്ക് തെന്നി വീണാണ് അപകടം ഉണ്ടായത്. സംഭവത്തില്‍ തലക്ക് സാരമായി പരുക്കേറ്റ ഹിമന്‍ഷുവിന് മണിക്കൂറുകള്‍ കഴിയുന്നതിന് മുമ്പ് തന്നെ മസ്തിഷ്‌ക മരണം സംഭവിച്ചിരുന്നു.

ഇക്കാര്യം ഇയാളുടെ രക്ഷിതാക്കളെ ആശുപത്രിയിലെ ഡോക്ടര്‍മാര്‍ അറിയിച്ചതോടെയാണ് ഇവര്‍ ഹിമന്‍ഷുവിന്റെ അവയവങ്ങള്‍ ദാനം ചെയ്യാന്‍ തീരുമാനിച്ചത്. മകന്റെ അവയവങ്ങള്‍ ദാനം ചെയ്യാന്‍ മാതാപിതാക്കള്‍ സന്നദ്ധത അറിയിച്ചതോടെ ഡോക്ടര്‍മാര്‍ അതിനുള്ള നടപടികള്‍ എടുക്കുകയായിരുന്നു.

ഹിമന്‍ഷുവിന്റെ കണ്ണുകളും, കിഡ്‌നിയും മണിപ്പാല്‍ ആശുപത്രിയില്‍ സൂക്ഷിച്ചിരിക്കുകയാണ്. ഹൃദയവും,കരളും മംഗളൂരു വിമാനത്താവളം വഴി ബംഗളൂരുവിലേക്ക് കൊണ്ടുപോയി. കെ.എം.സി ആശുപത്രിയിലെ ഡോ. പത്മരാജനാണ് അവയവ ദാന പ്രവൃത്തികള്‍ക്ക് നേതൃത്വം നല്‍കിയത്.