സുസുക: ജപ്പാനീസ് ഗ്രാന്‍ പ്രീ ഫോര്‍മുല വണ്‍ കിരീടം മെഴ്‌സിഡസിന്റെ നിക്കോ റോസ്ബര്‍ഗിന്. പോള്‍ പൊസിഷനില്‍ മത്സരിച്ച റോസ്ബര്‍ഗ് റെഡ് ബുള്‍ താരം മാര്‍ക്‌സ് വെര്‍സ്റ്റപ്പനെ രണ്ടാം സ്ഥാനത്തേക്കും ടീമംഗവും നിലവിലെ ലോക ചാംപ്യനുമായ ലൂയീസ് ഹാമില്‍ട്ടനെ മൂന്നാം സ്ഥാനത്തേക്കും പന്തള്ളിയാണ് കിരീടം സ്വന്തമാക്കിയത്. ഫെരാരി താരങ്ങളായ സെബാസ്റ്റ്യന്‍ വെറ്റല്‍, കിമി റൈക്കോണന്‍ എന്നിവര്‍ നാലും അഞ്ചും സ്ഥാനത്ത്. ഫോഴ്‌സ് ഇന്ത്യ താരങ്ങളായ സെര്‍ജിയോ പെരസ്, നിക്കോ ഹള്‍ക്കന്‍ബര്‍ഗ് യഥാക്രമം ഏഴും എട്ടും സ്ഥാനങ്ങളില്‍.
ലോക കിരീട പോരില്‍ ഒന്നാം സ്ഥാനത്തുള്ള റോസ്ബര്‍ഗ് നേട്ടത്തിലേക്ക് കൂടുതല്‍ അടുത്തു. രണ്ടാമതുള്ള ഹാമില്‍ട്ടനുമായി 33 പോയിന്റിന്റെ ലീഡുമായാണ് റോസ്ബര്‍ഗ് കുതിക്കുന്നത്.