ഗസ്സ സിറ്റി: സമാധാനത്തിന്റെ പുലരി വന്നെത്താന്‍ പോകുന്നുവെന്നതിന്റെ ആഹ്ലാദാരവങ്ങളില്‍ മുഴുകിയ പിഞ്ചോമനകള്‍ക്കു മേലായിരുന്നു കഴിഞ്ഞ ദിവസം സയണിസ്റ്റ് ഭീകരരുടെ മരണപ്പെയ്ത്ത്. ഹമാസുമായി വെടിനിര്‍ത്തലിന് സമ്മതിച്ചതിന് പിന്നാലെ ഗസ്സയില്‍ പരക്കെ ആക്രമണം നടത്തി ഇസ്‌റാഈല്‍. 21 കുഞ്ഞുങ്ങളും സ്ത്രീകളും ഉള്‍പെടെ നൂറോളം ഫലസ്തീനികളാണ് ആക്രമണങ്ങളില്‍ കൊല്ലപ്പെട്ടത്. 

ഗസ്സ സിറ്റിയില്‍ മാത്രം 30 പേരാണ് കൊല്ലപ്പെട്ടത്. കെട്ടിടാവശിഷ്ടങ്ങള്‍ക്കടിയില്‍ പെട്ടവരെ രക്ഷിക്കാനുള്ള ശ്രമം നടന്നുവരുകയാണെന്ന് ഫലസ്തീന്‍ സിവില്‍ ഡിഫന്‍സ് അറിയിച്ചു.

വെടിനിര്‍ത്തല്‍ വാര്‍ത്ത പുറത്തുവന്നതോടെ അഭയാര്‍ഥി ക്യാംപുകളിലേക്ക് മടങ്ങുന്നവര്‍ക്കു നേരെയും ആക്രമണമുണ്ടായി. ആക്രമണം കനത്തതോടെ ആളുകള്‍ ആഘോഷങ്ങള്‍ നിര്‍ത്തിവച്ചതായി റിപ്പോര്‍ട്ടുണ്ട്. ആശുപത്രികള്‍, വീടുകള്‍, ഷെല്‍ട്ടറുകള്‍ എന്നിവ ലക്ഷ്യമിട്ട് ഇസ്‌റാഈല്‍ യുദ്ധവിമാനങ്ങള്‍ ബോംബാക്രമണം നടത്തുകയാണ്.

അതിനിടെ അഭയാര്‍ഥിയെ പാര്‍പ്പിച്ച കേന്ദ്രത്തിന് നേരെയും ഇസ്‌റാഈല്‍ ആക്രമണം നടത്തിയെന്ന് ഹമാസ് അറിയിച്ചു. സംഘടനയുടെ സൈനിക വിഭാഗമായ അല്‍ ഖസ്സാം ബ്രിഗേഡാണ് ആക്രമണം നടന്ന വിവരം സ്ഥിരീകരിച്ചത്. ആദ്യഘട്ടത്തില്‍ ഹമാസ് മോചിപ്പിക്കാനിരുന്ന ബന്ദികളിലൊരാളെ പാര്‍പ്പിച്ചിരുന്ന കേന്ദ്രത്തിന് നേരെയാണ് ആക്രമണമുണ്ടായത്.

അല്‍ ഖസ്സാം ബ്രിഗേഡിന്റെ വക്താവായ അബു ഉബൈദയാണ് ഇക്കാര്യം പറഞ്ഞത്. ആദ്യഘട്ടത്തില്‍ മോചിപ്പിക്കാനിരുന്ന ബന്ദിയെ താമസിപ്പിച്ച കേന്ദ്രത്തിന് നേരെയാണ് ആക്രമണം നടന്നതെന്നും അദ്ദേഹം അറിയിച്ചു. എന്നാല്‍, ഇതുസംബന്ധിച്ച് കൂടുതല്‍ വിവരങ്ങള്‍ പുറത്തുവിടാന്‍ ഹമാസ് തയാറായിട്ടില്ല.