താമരശ്ശേരി: കേരള ഗ്രന്ഥശാല സംഘം സംസ്ഥാന പുരസ്‌കാര ജേതാവും അരനൂറ്റാണ്ടണ്ടുകാലം  താമരശേരി പബ്ലിക് ലൈബ്രറി സെക്രട്ടറിയും താമരശ്ശേരി പ്രസ് ക്ലബ്ബ് പ്രഥമ പ്രസിഡന്റുമായിരുന്ന പി.കെ.ജി വാര്യര്‍ മാസ്റ്ററുടെ ഒന്നാം ചരമവാര്‍ഷികത്തോടനുബന്ധിച്ച് വിവിധ പരിപാടികള്‍ നടത്തുന്നു.
 താമരശ്ശേരി സൗഹൃദ വേദിയും പ്രസ് ക്ലബ്ബും ചേര്‍ന്ന് 27ന് താമരശേരി പബ്ലിക് ലൈബ്രറി പരിസരത്താണ് പരിപാടികള്‍ സംഘടിപ്പിക്കുന്നത്.
രാവിലെ 10ന് അജയന്‍ കാരാടിയുടെ ചിത്രപ്രദര്‍ശനം ലൈബ്രറി ഹാളില്‍ നാടകകൃത്ത് ഹുസൈന്‍ കാരാടി ഉദ്ഘാടനം ചെയ്യും.
വൈകിട്ട് മൂന്നുമണിക്ക് നടക്കുന്ന മാധ്യമ സ്വാതന്ത്ര്യം  സാധ്യതയും പരിമിതിയും എന്ന വിഷയത്തിലുള്ള മാധ്യമ സെമിനാര്‍ കേരള പ്രസ് അക്കാദമി മുന്‍ ചെയര്‍മാന്‍ എന്‍.പി രാജേന്ദ്രനും വൈകിട്ട് അഞ്ചുമണിക്ക് നടക്കുന്ന അനുസ്മരണ സമ്മേളനം പ്രമുഖ സാഹിത്യകാരന്‍ പി.ആര്‍ നാഥനും ഉദ്ഘാടനം ചെയ്യും.
സാമൂഹ്യ -സാംസ്‌കാരിക-രാഷ്ട്രീയ മേഖലയിലെ പ്രമുഖര്‍ സംബന്ധിക്കും. വൈകിട്ട് 6.30ന് ആലപ്പുഴ തകഴിക്കാരന്‍ ജയചന്ദ്രന്‍ ആവിഷ്‌കരിക്കുന്ന ഏകപാത്രനാടകം 'ജോസഫിന്റെ റേഡിയോ' അവതരിപ്പിക്കും.
രാത്രി ഏഴിനു നടക്കുന്ന ഗാനാഞ്ജലിക്ക് താമരശ്ശേരിയിലെ ഗായകരായ ഉണ്ണിമായ, സി.ജി സുമേഷ്,  രശ്മി രാമന്‍, സതീഷ് തേവള്ളി,കെ.പി കൃഷ്ണന്‍ തുടങ്ങിയവര്‍ നേതൃത്വം നല്‍കും.