പുളിക്കല്‍: പെരിയമ്പലത്ത് ഹര്‍ത്താല്‍ അനുകൂലികള്‍ എയര്‍പ്പോര്‍ട്ടിലേക്ക് പോകുകയായിരുന്ന ഇന്നോവ കാര്‍ അടിച്ചുതകര്‍ത്തു.പുളിക്കല്‍ അങ്ങാടിയില്‍ കട കമ്പോളങ്ങള്‍ അടഞ്ഞു കിടന്നു.
വൈകീട്ട് നടന്ന പ്രകടനത്തില്‍ കുടുംബസമേതം സഞ്ചരിക്കുകയായിരുന്ന കാര്‍ യാത്രക്കാരനെ ആക്രമിച്ചത് നേരിയ സംഘര്‍ഷാവസ്ഥയുണ്ടാക്കി. പൊലിസിന്റെ അവസരോചിത ഇടപെടല്‍ സമാധാനാന്തരീക്ഷം നിലനിര്‍ത്തി.
കൊട്ടപ്പുറത്ത് കടകള്‍ അടക്കാന്‍ ആവശ്യപ്പെട്ടെങ്കിലും നാട്ടുകാരുടെ ഇടപെടല്‍ മൂലം പതിവ് പോലെ കടകള്‍ തുറന്ന് പ്രവര്‍ത്തിച്ചു.
അങ്ങാടിപ്പുറം: അങ്ങാടിപ്പുറത്ത് ബി.ജെ.പി പ്രവര്‍ത്തകര്‍ പ്രതിഷേധ പ്രകടനം നടത്തി.യുവമോര്‍ച്ച ജില്ലാ പ്രസിഡന്റ് ബി.രതീഷ്, വാസു മാസ്റ്റര്‍നേതൃത്വം നല്‍കി.
വണ്ടൂര്‍: ബി.ജെ.പി ഹര്‍ത്താല്‍ വണ്ടൂര്‍ മേഖലയില്‍ പൂര്‍ണം. ഇരുചക്ര വാഹനങ്ങള്‍ ഒഴിച്ചുള്ള എല്ലാ സ്വകാര്യവാഹനങ്ങളും റോഡില്‍ തടഞ്ഞിട്ടു. വണ്ടൂര്‍ ബൈപ്പാസ് റോഡ് വഴി വന്ന ഓട്ടോറിക്ഷ തടയുകയും ഗ്ലാസ് തകര്‍ക്കുകയും ചെയ്തു.