കാളികാവ്: ഭാര്യയെ വ്യക്ക വില്‍ക്കാന്‍ നിര്‍ബന്ധിപ്പിച്ചു പീഡിപ്പിച്ച ഭര്‍ത്താവ് പൊലിസ് പിടിയില്‍.  ചോക്കാട് കല്ലാമൂല സ്വദേശിയായ യുവതിയുടെ പരാതിയിലാണ് തിരുവനന്തപുരം കണിയാപുരം സ്വദേശിയായ ഭര്‍ത്താവ് ഷഫീറിനെ പൊലിസ് പിടികൂടിയത്. ഇയാള്‍ നേരത്തെ ഒരു വൃക്ക കൈമാറിയ ആളാണ്.
എല്ലാ മാനദണ്ഡങ്ങളും പാലിച്ചാണ് ഇയാള്‍ വ്യക്ക കൈമാറിയിട്ടുള്ളത്. ഇത്തരത്തില്‍ ഭാര്യയുടെ വൃക്ക കൈമാറ്റം ചെയ്യാന്‍ ശ്രമംനടത്തുന്നതിനിടയിലാണ് പിടിയിലായത്. ഒരു വര്‍ഷം മുന്‍പാണ് ഷഫീര്‍ വൃക്ക ദാനം ചെയ്തതെന്നാണ് ഭാര്യ പറയുന്നത്. മദ്യപാനം ഒഴിവാക്കുമെന്നും കടബാധ്യത തീര്‍ക്കാമെന്നും പറഞ്ഞാണ് അന്നു വൃക്ക കൈമാറാന്‍ ജീവിതപങ്കാളിയുടെ സമ്മതം വാങ്ങിച്ചത്.
തുടര്‍ന്നു രണ്ടു മാസംമുന്‍പാണ് ഭാര്യയെ വൃക്ക ദാനംചെയ്യാനെന്നു പറഞ്ഞു തൃശൂരിലെ സ്വകാര്യ ആശുപത്രിയില്‍ കൊണ്ടുപോയത്. വൃക്ക കൈമാറുന്നതിന് കോഴിക്കോട്ടേതുള്‍പ്പെടെ രണ്ട് ആശുപത്രികളിലെ പരിശോധനകള്‍ പൂര്‍ത്തിയാക്കിയിട്ടുണ്ട്.
പരിശോധനയ്ക്കു തയാറായെന്നതല്ലതെ വൃക്ക നല്‍കുവാനുള്ള നടപടിക്രമങ്ങള്‍ പൂര്‍ത്തിയാക്കിയിട്ടില്ലെന്നു പരാതിക്കാരി പറഞ്ഞു.
ഫോണ്‍പോലുമില്ലാത്തതിനാല്‍ വീട്ടുകാരെ വിവരമറിയിക്കാനും കഴിഞ്ഞില്ല. ആരെയും വിവരമറിയിക്കേണ്ടെന്നു പറഞ്ഞ ഭര്‍ത്താവ്, വൃക്കയുടെ പരിശോധനാവേളയില്‍തന്നെ കുറച്ചു തുക കൈപ്പറ്റിയതായും ഇവര്‍ പറഞ്ഞു.
ഒരു മാസംമുന്‍പു മദ്യപിച്ചെത്തി അക്രമിച്ചതിനെ തുടര്‍ന്നു തിരുവനന്തപുരത്തുനിന്നു ചോക്കാട് വീട്ടിലെത്തിയ പരാതിക്കാരി ബുധനാഴ്ചയാണ് ഭര്‍ത്താവിനെ തന്ത്രപരമായി വിളിച്ചുവരുത്തിയത്.
വീട്ടുകാര്‍ സ്വീകരിക്കുന്നില്ലെന്നും തന്നെ കൊണ്ടുപോകണമെന്നും അറിയിച്ചതിനെ തുടര്‍ന്നാണ് ഷഫീര്‍ ഭാര്യവീട്ടിലെത്തിയത്. തുടര്‍ന്നു നാട്ടുകാരുടെ സഹായത്തോടെ പിടികൂടി പൊലിസില്‍ ഏല്‍പ്പിക്കുകയായിരുന്നു.
പ്രതിക്കെതിരേ സ്ത്രീധന പീഡനത്തിനാണ് കേസെടുത്തിട്ടുള്ളതെന്നും വൃക്ക വില്‍ക്കാന്‍ നിര്‍ബന്ധിപ്പിച്ചതായി ഇയാള്‍ക്കെതിരേ ഭാര്യയുടെ പരാതിയിലുണ്ടെന്നും കാളികാവ് എസ്.ഐ കെ.പി സുരേഷ് ബാബു പറഞ്ഞു. കോടതിയില്‍ ഹാജാക്കിയ പ്രതിയെ റിമാന്‍ഡ് ചെയ്തു.