കണ്ണൂര്‍: സി.പി.എം ലോക്കല്‍ കമ്മിറ്റിയംഗവും ബ്രാഞ്ച് സെക്രട്ടറിയുമായ പാതിരിയാട് വാളാങ്കിച്ചാലിലെ കെ മോഹനന്‍, ബി.ജെ.പി പ്രവര്‍ത്തകന്‍ പിണറായിയിലെ രമിത്ത് എന്നിവരുടെ കൊലപാതകങ്ങള്‍ സി.ബി.ഐ അന്വേഷിക്കണമെന്നു കോണ്‍ഗ്രസ് നേതാവ് കെ സുധാകരന്‍.

അക്രമരാഷ്ട്രീയത്തില്‍ നേതാക്കളുടെ പങ്ക് അന്വേഷിക്കണമെന്ന സി.പി.എം ജില്ലാ സെക്രട്ടറി പി ജയരാജന്റെ ആവശ്യം താന്‍ പിന്തുണക്കുകയാണ്. എന്നാല്‍ എല്ലാ അക്രമക്കേസുകളിലെയും നേതൃത്വത്തിന്റെ പങ്ക് അന്വേഷിക്കണം. ടി.പി ചന്ദ്രശേഖരന്‍ വധക്കേസിലെ ഗൂഡാലോചന സി.ബി.ഐ അന്വേഷിച്ചിരുന്നുവെങ്കില്‍ കേരളത്തിന്റെ രാഷ്ട്രീയ ചരിത്രം തന്നെ മാറുമായിരുന്നു. അന്നു സംശയത്തിന്റെ നിഴലിലുണ്ടായിരുന്ന സി.പി.എം നേതാക്കള്‍ ഇന്നു മുഖ്യമന്ത്രിയും മന്ത്രിമാരുമാണ്. കണ്ണൂരിലെ കൊലപാതക രാഷ്ട്രീയ യുവമനസുകളെയും ആകര്‍ഷിക്കുകയാണ്. ഐ.എസിലേക്ക് ഏറ്റവും കൂടുതല്‍ പേരെ കണ്ണൂരില്‍ നിന്ന് ആകര്‍ഷിച്ചത് ഇതിന്റെ ഉദാഹരണമാണ്. കണ്ണൂരിലെ അക്രമം അവസാനിപ്പിക്കണമെന്ന് ആവശ്യപ്പെടാത്ത മുഖ്യമന്ത്രി ക്രൂരമനസിന് ഉടമയാണെന്നും സുധാകരന്‍ മാധ്യമപ്രവര്‍ത്തകരോടു പറഞ്ഞു.