കല്‍പ്പറ്റ: ശ്രീനാരായണ ഗുരുവിന്റെ നമുക്ക് ജാതിയില്ല വിളംബര ശതാബ്ദിയാഘോഷത്തിന്റെ ജില്ലാതല ഉദ്ഘാടനം ഇന്ന് കല്‍പ്പറ്റയില്‍ നടക്കും. ഇന്‍ഫര്‍മേഷന്‍ ആന്‍ഡ് പബ്ലിക് റിലേഷന്‍സ് വകുപ്പ് ജില്ലാ ലൈബ്രറി കൗണ്‍സിലിന്റെ സഹകരണത്തോടെയാണ് പരിപാടികള്‍ സംഘടിപ്പിക്കുന്നത്.
വൈകീട്ട് മൂന്നിന് കല്‍പ്പറ്റ എസ്.കെ.എം.ജെ സ്‌കൂള്‍ പരിസരത്ത് നിന്ന് തുടങ്ങുന്ന ഘോഷയാത്ര വിജയ പമ്പ് പരിസരത്ത് സമാപിക്കും. വൈകിട്ട് അഞ്ചിന്  നടക്കുന്ന പൊതുസമ്മേളനം ഗതാഗത വകുപ്പ് മന്ത്രി എ.കെ ശശീന്ദ്രന്‍ ഉദ്ഘാടനം ചെയ്യും. സി.കെ ശശീന്ദ്രന്‍ എം.എല്‍.എ അധ്യക്ഷനാകും.
എം.എല്‍.എമാരായ ഒ.ആര്‍ കേളു, ഐ.സി ബാലകൃഷ്ണന്‍, ജില്ലാ പഞ്ചായത്ത് പ്രസിഡന്റ് ടി ഉഷാകുമാരി എന്നിവര്‍ മൂന്ന് താലൂക്ക് ലൈബ്രറി കൗണ്‍സില്‍ ഭാരവാഹികള്‍ക്ക് ശ്രീനാരായണഗുരു വിളംബര കലണ്ടര്‍ കൈമാറും.
കല്‍പ്പറ്റ നഗരസഭാധ്യക്ഷ ബിന്ദു ജോസ്, ജില്ലാ കലക്ടര്‍ ഡോ.ബി.എസ് തിരുമേനി തുടങ്ങിയവര്‍ പങ്കെടുക്കും. കാലിക്കറ്റ് യൂനിവേഴ്‌സിറ്റി മലയാള വിഭാഗം അധ്യാപകന്‍ ഡോ.ആര്‍.വി.എം ദിവാകരന്‍ മുഖ്യ പ്രഭാഷണം നടത്തും.