തൃക്കരിപ്പൂര്‍: ഒരു കാലത്ത് പാടത്തുനിന്നു കാര്‍ഷികവൃത്തിക്കൊപ്പം ഉയര്‍ന്നു വന്നിരുന്ന കൊയ്ത്തുപാട്ടുകളുടെ ഈണവും ഭാഷയും അര്‍ഥവും എല്ലാം ഇന്നു മാറിയിരിക്കുന്നു. കൊയ്യാന്‍ ആളെ കിട്ടാത്തതു കാരണം നെല്ലുകളെല്ലം പാടത്തു തന്നെ വീഴുന്ന സാഹചര്യമുണ്ടായപ്പോള്‍ പകരം വന്ന തൊഴിലാളികളുടെ ഭാഷയ്ക്കും രീതിക്കും അനുസരിച്ച് നാട്ടിപാട്ടുകളും മാറ്റത്തിനു വഴിമാറിക്കൊടുക്കുകയാണ്.
പാകമായ കതിരുകള്‍  കൊയ്‌തെടുക്കാന്‍ തൊഴിലാളികളെ കിട്ടാതായതോടെ കര്‍ഷകര്‍ മറുനാടന്‍ തൊഴിലാളികളുടെ സേവനം തേടിയതോടെപാടത്തു നിന്നു കൊയ്ത്തുപാട്ടുകള്‍ക്കു പകരം ഉയരുന്നതു ഹിന്ദിപ്പാട്ടുകളാണ്. നെല്‍മണികള്‍ പാടത്തുതന്നെ വീണു മുളപൊട്ടുന്ന അവസ്ഥ നാട്ടിലെ തൊഴിലാളികളുടെ ശ്രദ്ധയില്‍പെടുത്തിയെങ്കിലും തൊഴിലുറപ്പിന്റെ പേര് പറഞ്ഞ് ഒഴിഞ്ഞു മാറുകയായിരുന്നു.
ജാര്‍ഖണ്ഡില്‍ കൊയ്ത്ത് ജോലി ചെയ്തിരുന്ന മുഹമ്മദ് ഇര്‍ഷാദും മുഹമ്മദ് ഇസ്ബാഖും കര്‍ഷകരുടെ സഹായത്തിനെത്തുകയായിരുന്നു. കൊയ്ത്ത് പരിചയമുള്ള പത്തോളം ജാര്‍ഖണ്ഡ് സ്വദേശികളാണു കൊയ്ത്ത് ജോലിയുമായി ബന്ധപ്പെട്ടു തൃക്കരിപ്പൂരില്‍ തമ്പടിച്ചിട്ടുള്ളത്.
 തൃക്കരിപ്പൂര്‍ ചെറുകാനത്തെ പാടത്താണ് കഴിഞ്ഞ ദിവസം മുതല്‍ ജാര്‍ഖണ്ഡുകാര്‍ കൊയ്യാനിറങ്ങിയത്. ഇവര്‍ മൊബൈലിലെ ഹിന്ദി പാട്ട് ആസ്വദിച്ചുള്ള കൊയ്ത്ത് നാട്ടുകാര്‍ക്കു പുതുമയുള്ള അനുഭവമായി.