കോഴിക്കോട്: വടകര തണല്‍ അഭയകേന്ദ്രവും കുറ്റ്യാടി കരുണ പെയിന്‍ ആന്‍ഡ് പാലിയേറ്റീവും  ചേര്‍ന്ന് കുറ്റ്യാടി സംസ്ഥാന പാതക്കു സമീപം തുടങ്ങുന്ന സ്‌പെഷല്‍ സ്‌കൂളിന്റെ ശിലാസ്ഥാപനം നാളെ നടക്കും. പരിപാടി രാവിലെ 10.30ന് മന്ത്രി ടി.പി രാമകൃഷ്ണന്‍ ഉദ്ഘാടനം ചെയ്യും. മന്ത്രി എ.കെ ശശീന്ദ്രന്‍ അധ്യക്ഷനാകും. ഇറാം ഗ്രൂപ്പ്  ചെയര്‍മാന്‍ ഡോ. സിദ്ദീഖ് അഹമ്മദ് ശിലാസ്ഥാപനം നിര്‍വഹിക്കും. തെരുവത്ത് അബ്ദുല്‍ മജീദ് സൗജന്യമായി നല്‍കിയ ഒരേക്കര്‍ 20 സെന്റ് സ്ഥലത്താണ്  രാജ്യാന്തര നിലവാരത്തില്‍ സ്‌കൂളൊരുങ്ങുന്നത്.
ഓട്ടിസം ബാധിതര്‍ക്കും ചലന, കാഴ്ച, കേള്‍വി, മാനസിക വൈകല്യമുള്ളവര്‍ക്കുമായി തുടങ്ങുന്ന സ്‌കൂളിന്റെ രൂപരേഖ തയാറാക്കിയത് പത്മശ്രീ ജേതാവ് ആര്‍ക്കിടെക്ട് ജി. ശങ്കറാണ്. അഞ്ചു ബ്ലോക്കുകളുള്ള കെട്ടിടത്തിന് ഏഴരക്കോടി രൂപയാണ് ചെലവ് പ്രതീക്ഷിക്കുന്നതെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. തണല്‍ സെക്രട്ടറി ടി.ഐ നാസര്‍, അബ്ദുല്‍ മജീദ് തെരുവെത്ത്, കെ.വി കുഞ്ഞിരാമന്‍, നസീര്‍ ആനേരി, ഉബൈദ് വാഴയില്‍, അബ്ദുല്ല സല്‍മാന്‍, ഇ.വി രാമചന്ദ്രന്‍ വാര്‍ത്താ സമ്മേളനത്തില്‍ പങ്കെടുത്തു.