മുക്കം: കാരശ്ശേരി സര്‍വിസ് സഹകരണ ബാങ്ക് ഏര്‍പ്പെടുത്തിയ സംസ്ഥാനത്തെ മികച്ച സഹകാരിക്കുള്ള ഇ. നാരായണന്‍ സ്മാരക അവാര്‍ഡ് തൃശൂര്‍ സര്‍വിസ് സഹകരണ ബാങ്ക് പ്രസിഡന്റ് എം.കെ കണ്ണനു നാളെ സമ്മാനിക്കും. തലശ്ശേരി സഹകരണ ബാങ്ക് സ്ഥാപക പ്രസിഡന്റ്, റബ്‌കോ ചെയര്‍മാന്‍, തലശ്ശേരി സഹകരണ ആശുപത്രി പ്രസിഡന്റ്, സംസ്ഥാന സഹകരണ യൂനിയന്‍ പ്രസിഡന്റ് എന്നീ നിലകളില്‍ പ്രവര്‍ത്തിച്ചിരുന്ന ഇ. നാരായണന്റെ സ്മരണക്കായാണ് കാരശ്ശേരി ബാങ്ക് അവാര്‍ഡ് ഏര്‍പ്പെടുത്തിയത്.
തൃശൂര്‍ സര്‍വിസ് സഹകരണ ബാങ്ക് ഓഡിറ്റോറിയത്തില്‍ രാവിലെ 11നു നടക്കുന്ന ചടങ്ങില്‍ കൃഷി വകുപ്പുമന്ത്രി വി.എസ് സുനില്‍കുമാര്‍ അവാര്‍ഡ് ദാനം നടത്തും. മുന്‍ സഹകരണ വകുപ്പുമന്ത്രി സി.എന്‍ ബാലകൃഷ്ണന്‍ അധ്യക്ഷനാകും. സംസ്ഥാന സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി ദാസന്‍ പൊന്നാട അണിയിക്കും. സി.എം.പി സംസ്ഥാന സെക്രട്ടറി കെ.ആര്‍ അരവിന്ദാക്ഷന്‍ പ്രശസ്തിപത്രം സമര്‍പ്പിക്കും. പാലക്കാട് സഹകരണ കോളജ് പ്രിന്‍സിപ്പല്‍ ആനിയമ്മ അലക്‌സ് ഇ.നാരായണന്‍ അനുസ്മരണ പ്രഭാഷണം നടത്തും.
കാരശ്ശേരി സഹകരണ ബാങ്ക് ചെയര്‍മാന്‍ എന്‍.കെ അബ്ദുറഹ്മാന്‍, മുന്‍ സ്പീക്കര്‍ കെ. രാധാകൃഷ്ണന്‍, മുന്‍ എം.എല്‍.എ പി.എ മാധവന്‍, തൃശൂര്‍ ജില്ലാ സഹകരണ ബാങ്ക് പ്രസിഡന്റ് എം.കെ അബ്ദുല്‍ സലാം, സി.പി.ഐ ജില്ലാ സെക്രട്ടറി കെ.കെ വല്‍സരാജ് പങ്കെടുക്കും.