പാലക്കാട്: പഴയകാല ഫിലിം സൊസൈറ്റി സംസ്‌കാരം കേരളത്തില്‍ തിരിച്ചുകൊണ്ടുവരണമെന്ന് മുഖ്യമന്ത്രി പിണറായി വിജയന്‍ പറഞ്ഞു. സംസ്ഥാന ചലച്ചിത്ര പുരസ്‌കാര സമര്‍പ്പണവും താരനിശയും ഇന്ദിരാഗാന്ധി മുനിസിപ്പല്‍ സ്റ്റേഡിയത്തില്‍  ഉദ്ഘാടനം ചെയ്ത് സംസാരിക്കുകയായിരുന്നു മുഖ്യമന്ത്രി.
പഴയകാല ഫിലിം സൊസൈറ്റി സംസ്‌കാരം വളര്‍ന്നുപന്തലിച്ചത് കേരളത്തിലാണ്. സിനിമയില്‍ ആധുനികതയും പരീക്ഷണാത്മകതയും സമന്വയിപ്പിക്കുന്നത് സിനിമ കാലത്തിനനുസരിച്ച് നവീകരിക്കപ്പെടുന്നതിന് കാരണമാകും. ചലചിത്ര പ്രവര്‍ത്തകര്‍ ജീവിത യാഥാര്‍ഥ്യങ്ങള്‍ മറന്ന് സിനിമ ചെയ്യരുത്. മണ്ണിന്റെ മണമുള്ള പച്ചയായ ജീവിത യാഥാര്‍ഥ്യങ്ങള്‍ മലയാളസിനിമയ്ക്ക് പുറത്താണെന്നത് ആശങ്കാജനകമാണ്.
ലോകസിനിമയിലെ സാങ്കേതിക മികവുകളെല്ലാം ഇന്ന് മലയാള സിനിമയ്ക്ക് പ്രാപ്യമാണ്. അന്താരാഷ്ട്ര ചലച്ചിത്ര മേള സംസ്ഥാനത്തിന്റെ മറ്റിടങ്ങളിലും സംഘടിപ്പിക്കുന്നത് സര്‍ക്കാര്‍ ആലോചിച്ചുവരികയാണ്. ഒറ്റപ്പാലത്തെ ഫിലിം സൊസൈറ്റി ഉടന്‍ പൂര്‍ത്തിയാക്കുമെന്നും മുഖ്യമന്ത്രി പറഞ്ഞു.
    നിയമ,സാംസ്‌കാരിക മന്ത്രി എ.കെ ബാലന്റെ അധ്യക്ഷതയില്‍ ചേര്‍ന്ന പുരസ്‌ക്കാര സമര്‍പ്പണ സമ്മേളനത്തില്‍ സുവനീറിന്റെ പ്രകാശനം സ്പീക്കര്‍ പി.ശ്രീരാമകൃഷ്ണന്‍ നിര്‍വഹിച്ചു. മന്ത്രിമാരായ ഇ. ചന്ദ്രശേഖരന്‍, രാമചന്ദ്രന്‍ കടന്നപ്പള്ളി, എം.പിമാരായ എം.ബി രാജേഷ്, പി.കെ ബിജു, എം.എല്‍.എയും സിനിമാതാരവുമായ മുകേഷിന് പുറമെ ജില്ലയിലെ നിയോജകമണ്ഡലങ്ങളില്‍ നിന്നുള്ള എം.എല്‍.എമാര്‍, ജില്ലാ പഞ്ചായത്ത് പ്രസിഡന്റ് അഡ്വ. കെ.ശാന്തകുമാരി, ജില്ലാ കലക്ടര്‍ പി.മേരിക്കുട്ടി, സാംസ്‌കാരിക വകുപ്പ് സെക്രട്ടറി റാണി ജോര്‍ജ്, ചലച്ചിത്ര അക്കാഡമി ചെയര്‍മാന്‍ കമല്‍, സംഘാടക സമിതി കണ്‍വീനര്‍ ടി.ആര്‍.അജയന്‍ സംബന്ധിച്ചു.
ജെ.സി ഡാനിയല്‍ അവാര്‍ഡ് ജേതാവ് കെ.ജി ജോര്‍ജ്, ചലചിത്ര രംഗത്ത് അന്‍പത് വര്‍ഷം പിന്നിട്ട മധു, ശ്രീകുമാരന്‍ തമ്പി, ഷീല, ശാരദ, എം.കെ അര്‍ജുനന്‍, കെ.പി.എ.സി ലളിത, ഒസ്‌കാര്‍ അടക്കമുള്ള അന്താരാഷ്ട്ര പുരസ്‌കാരങ്ങള്‍ നേടിയ റസൂല്‍ പൂക്കുട്ടി എന്നിവരെ പുരസ്‌കാര സന്ധ്യയില്‍ ആദരിച്ചു.
സിനിമാതാരങ്ങളായ ജയറാം, നാസര്‍, ഭാഗ്യരാജ്, സംവിധായകന്‍ ലെനിന്‍ രാജേന്ദ്രന്‍ തുടങ്ങിയവരും ഉദ്ഘാടന പരിപാടിയില്‍ സന്നിഹിതരായിരുന്നു.