പനാജി: പാകിസ്താനുമായി പ്രതിരോധ രംഗത്ത് ഒരു തരത്തിലുള്ള കരാറുമില്ലെന്നും ഇതുമായി ബന്ധപ്പെട്ട് യാതൊരു കരാറിലും ഏര്‍പ്പെടാന്‍ റഷ്യക്ക് പദ്ധതിയില്ലെന്നും റഷ്യന്‍ റോസ്റ്റക് കോര്‍പ് മേധാവി സെര്‍ജി ചെമസോവ് .

പാകിസ്താന് ആധുനിക വിമാനങ്ങളോ യുദ്ധവിമാനങ്ങളോനല്‍കിയിട്ടില്ല.യാത്രാ ആവശ്യങ്ങള്‍ക്കുപയോഗിക്കാവുന്ന ഹെലികോപ്റ്ററുകള്‍ മാത്രമാണ് പാകിസ്താന് നല്‍കിയിട്ടുള്ളത്. കരാര്‍ അതോടെ അവസാനിച്ചതായും അദ്ദേഹം പറഞ്ഞു.

പ്രതിരോധ രംഗവുമായി ബന്ധപ്പെട്ട ഉപകരണങ്ങള്‍ പാകിസ്താന് നല്‍കാന്‍ പദ്ധതികളോ കരാറുകളോ ഇല്ലെന്നും അദ്ദേഹം കൂട്ടിച്ചേര്‍ത്തു.

സെപ്തംബറില്‍ പാകിസ്താനുമായി നടന്ന സംയുക്ത സൈനിക അഭ്യാസം ഭീകരവാദ വിരുദ്ധ നടപടിയുടെ ഭാഗമാണെന്നും അദ്ദേഹം പറഞ്ഞു. അത് ഐ.എസ് പോലുള്ള തീവ്രവാദ സംഘടനകളെ നേരിടുന്നതില്‍ പാകിസ്താനെ സജ്ജമാക്കുന്നതിനാണ്. അതുകൊണ്ട് തന്നെ അത് വളരെ പ്രധാനപ്പെട്ടതുമാണ്. സൈനിക അഭ്യാസം ഒരിക്കലും ഇന്ത്യയെ ലക്ഷ്യം വച്ചുകൊണ്ടുള്ളതല്ലെന്നും അദ്ദേഹം വ്യക്തമാക്കി.