ചെറുതോണി: വിവാഹ സംഘം സഞ്ചരിച്ച മാരുതി റിറ്റ്‌സ് കാര്‍ നിയന്ത്രണം വിട്ട് കൊക്കയിലേക്ക് മറിഞ്ഞ് ഡ്രൈവര്‍ ഉള്‍പ്പടെ മൂന്ന് പേര്‍ക്ക് ഗുരുതരമായി പരുക്കേറ്റു.
വാഴക്കുളം സ്വദേശി തോട്ടുംങ്കല്‍ ലിജിന്‍(25), തൊടുപുഴ മേലേപറമ്പില്‍ ഷാജഹാന്‍(30), കാര്‍ ഡ്രൈവര്‍ തൊടുപുഴ സ്വദേശി വിഷ്ണു(30) എന്നിവര്‍ക്കാണ് പരുക്കേറ്റത്. ഇന്നലെ ഉച്ചക്ക് 12 ന് ഇടുക്കി നേര്യമംഗലം റോഡില്‍ വെള്ളക്കയത്ത് വച്ചായിരുന്നു സംഭവം. ഇടുക്കി എസ്.ഐ വി വിനോദ്കുമാറിന്റെ നേതൃത്വത്തില്‍ പൊലിസ് സംഘം പരുക്കേറ്റവരെ ജില്ലാ ആശുപത്രിയില്‍ പ്രവേശിപ്പിച്ചു. പരുക്ക് ഗുരുതരമായതിനാല്‍ പ്രാഥമിക ചികിത്സ നല്‍കിയതിനു ശേഷം ഇവരെ കോട്ടയം മെഡിക്കല്‍ കോളജിലേക്ക് മാറ്റി. ലിജിന്റെതാണ് അപകടത്തില്‍പ്പെട്ട കാര്‍. തടിയംമ്പാട് വിവാഹ ചടങ്ങിന് പോയതായിരുന്നു ഇവര്‍.
വേഗത്തില്‍ വന്ന കാര്‍ വളവില്‍ നിയന്ത്രണം വിട്ട് ഫില്ലിംങ് വശത്തെ മണ്‍തിട്ടയില്‍ കയറി തെറിച്ച് മരത്തില്‍ ഇടിച്ച് താഴെക്ക് മറിയുകയായിരുന്നു.
മരത്തില്‍ ഇടിച്ചില്ലായിരുന്നെങ്കില്‍ കാര്‍ പാറക്കുട്ടങ്ങളിലൂടെ മലക്കം മറിഞ്ഞ് പൊരിയാറ്റില്‍ പതിക്കുമായിരുന്നു.