എടച്ചേരി: പ്രധാനമന്ത്രി നരേന്ദ്രമോദിയുടെ ലക്ഷ്യം നാടിന്റെ വികസനമല്ലെന്നും ആര്‍.എസ്.എസിനെ വളര്‍ത്തലാണെന്നും സി.പി.എം ജനറല്‍ സെക്രട്ടറി സീതാറാം യെച്ചൂരി. എല്‍.ഡി.എഫ് സ്ഥാനാര്‍ഥികളുടെ തെരഞ്ഞെടുപ്പു പ്രചരണാര്‍ഥം പുറമേരിയില്‍ സംഘടിപ്പിച്ച പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
മെയ്ക്കിങ് ഇന്ത്യ, സ്റ്റാര്‍ട്ട് അപ് ഇന്ത്യ തുടങ്ങിയ പദ്ധതികള്‍ ജനങ്ങളുടെ കണ്ണില്‍ പൊടിയിടാന്‍ വേണ്ടി മാത്രം നടപ്പാക്കാന്‍ ശ്രമിച്ചതാണ്.

എന്നാല്‍ മോദി സര്‍ക്കാര്‍ അധികാരമേറ്റു ചുരുങ്ങിയ കാലങ്ങള്‍ക്കിടയില്‍ തന്നെ ഇന്ത്യയിലെ വ്യാവസായിക, കാര്‍ഷിക മേഖലകള്‍ പാടേ തകര്‍ന്നുതരിപ്പണമായി. രാജ്യം മൊത്തമായും കുത്തക മുതലാളിമാര്‍ക്കു പണയപ്പെടുത്തുന്ന ജോലിയാണ് മോദി നടത്തുന്നത്. മതസൗഹാര്‍ദത്തിനു പേരുകേട്ട കേരളത്തിലും വര്‍ഗീയ വിദ്വേഷം സൃഷ്ടിക്കാനാണ് മോദി ഇപ്പോള്‍ ശ്രമിക്കുന്നത്. ഇന്ത്യയിലെ മുസ്‌ലിം, ക്രിസ്ത്യന്‍ മതന്യൂനപക്ഷങ്ങളെയും കമ്മ്യൂണിസ്റ്റ് പാര്‍ട്ടിയെയും നശിപ്പിച്ചാല്‍ മാത്രമേ ആര്‍.എസ്.എസിന്റെ ഹിന്ദുരാഷ്ട്രം എന്ന ലക്ഷ്യം പൂര്‍ത്തീകരിക്കാനാകൂ. ഇന്ത്യയിലെ ഏറ്റവും വികസിതസംസ്ഥാനമാണു കേരളം. മനുഷ്യ വികസന സൂചികയില്‍ കേരളം ഒന്നാം സ്ഥാനത്താണ്.

എന്നാല്‍, നരേന്ദ്രമോദി ഏറെക്കാലം ഭരിച്ച ഗുജറാത്ത് പന്ത്രണ്ടാം സ്ഥാനത്താണുള്ളത്. കേരളത്തെ ഗുജറാത്താക്കുമെന്ന മോദിയുടെ പ്രസ്താവനയെയും യെച്ചൂരി പരിഹസിച്ചു.
ചടങ്ങില്‍ നാദാപുരം, കുറ്റ്യാടി, വടകര മണ്ഡലങ്ങളിലെ എല്‍.ഡി.എഫ് സ്ഥാനാര്‍ഥികളായ ഇ.കെ വിജയന്‍, കെ.കെ ലതിക, സി.കെ നാണു, എല്‍.ഡി.എഫ് നേതാക്കളായ വി.പി കുഞ്ഞികൃഷ്ണന്‍, കെ.പി കുഞ്ഞമ്മദ്കുട്ടി, ടി.കെ രാജന്‍ മാസ്റ്റര്‍ സംസാരിച്ചു.