പാപ്പിനിശ്ശേരി: വളപട്ടണം പാലത്തിലെ ഉപരിതലം ബലപ്പെടുത്തുന്ന ജോലികള്‍ അവസാന ഘട്ടത്തിലേക്ക്. ഇരുവശത്തും രണ്ട് ഘട്ടങ്ങളിലായി 15 എക്‌സ്പാന്‍ഷന്‍ ജോയിന്റുകളുടെ കോണ്‍ക്രീറ്റ് ജോലികള്‍ ഇന്നലെയോടെ പൂര്‍ത്തിയായി. ഒരു വശത്ത് ഭാഗികമായി 15 ജോയിന്റുകളുടെയുടെയും കേട്‌വന്ന സ്ലാബുകളുടെയും കോണ്‍ക്രീറ്റ് പ്രവൃത്തികള്‍ പൂര്‍ത്തിയായിരുന്നു. രണ്ടാം ഘട്ടമായി മറുവശത്ത് ബാക്കിയുള്ള എക്‌സ്പാന്‍ഷന്‍ ജോയിന്റുകളുടെ കോണ്‍ക്രീറ്റ് ജോലികള്‍ കഴിഞ്ഞു. ഇതേ ഭാഗത്ത് കേടുവന്ന സ്ലാബുകള്‍ കോണ്‍ക്രീറ്റ് ചെയ്യുന്ന ജോലികള്‍ ഇന്നലെ രാത്രി മുതല്‍ ആരംഭിച്ചു. കോണ്‍ക്രീറ്റ് പ്രവൃത്തികള്‍ ഇന്ന് കഴിയുന്നതോടെ പാലത്തിന്റെ മുകള്‍ഭാഗത്തെ ടാറിങ് ഒഴികെയുള്ള ജോലികള്‍ അവസാനിക്കും. ഈ ഭാഗത്തെ കോണ്‍ക്രീറ്റ് ഉറച്ചതിനു ശേഷം അടുത്തയാഴ്ചയോടെ പാലത്തിന്റെ ഇരുഭാഗത്തു കൂടി വാഹനങ്ങളെ കടത്തി വിടാന്‍ സൗകര്യമൊരുക്കും. വെള്ളം അടിഭാഗത്തേക്ക് ഇറങ്ങാതിരിക്കാനുള്ള പ്രത്യേക ടാറിങ്ങ് മിശ്രിതം വാഹനങ്ങള്‍ക്ക് തടസമില്ലാതെ രാത്രി സമയങ്ങളില്‍ ചെയ്ത് തീര്‍ക്കും. ഇതിന്റെ ജോലികള്‍ കഴിയുന്നതോടെ മെക്കാഡം ടാറിങ്ങ് ജോലികളും നടക്കും.