തൊട്ടില്‍പ്പാലം: സ്‌കൂള്‍ വിട്ടു വീട്ടിലേക്കു വരികയായിരുന്ന വിദ്യാര്‍ഥിയെ ബസ് ജീവനക്കാരന്‍ മര്‍ദിച്ചതായി പരാതി. വട്ടോളി നാഷനല്‍ ഹയര്‍സെക്കന്‍ഡറി സ്‌കൂള്‍ പത്താംക്ലാസ് വിദ്യാര്‍ഥി കാഞ്ഞിരോളി ഏരത്തുവീട്ടില്‍ അലിയുടെ മകന്‍ ഉനൈസി(14)നാണ് ബസ് ജീവനക്കാരന്റെ മര്‍ദനമേറ്റത്. മുഖത്തും നാഭിക്കും പരുക്കേറ്റ ഉനൈസിനെ കുറ്റ്യാടി താലൂക്ക് ആശുപത്രിയില്‍ പ്രവേശിപ്പിച്ചു.
ഇന്നലെ വൈകിട്ടു നാലിന് കുറ്റ്യാടി പഴയ ബസ് സ്റ്റാന്‍ഡിനു സമീപത്താണു സംഭവം. വടകര-തൊട്ടില്‍പ്പാലം റൂട്ടിലോടുന്ന പി.പി ഡീലക്‌സ് ബസ് ജീവനക്കാരനാണു മര്‍ദിച്ചത്.
തിരക്കേറിയ ബസില്‍ നീങ്ങിനില്‍ക്കാന്‍ ഉനൈസിനോട് ബസ് ക്ലീനര്‍ ആവശ്യപ്പെട്ടിരുന്നു. വട്ടോളി സ്‌കൂളിലെ വിദ്യാര്‍ഥികളെ കുറ്റ്യാടിയില്‍നിന്ന് ബസില്‍ കയറ്റാനാകില്ലെന്നു പറഞ്ഞ ജീവനക്കാരനോട് കണ്‍സെഷനു പകരം മുഴുവന്‍ തുക നല്‍കാമെന്നു പറഞ്ഞിട്ടും ബസില്‍നിന്നു ബലമായി പിടിച്ചിറക്കി മര്‍ദിക്കുകയായിരുന്നുവെന്ന് ഉനൈസ് പറഞ്ഞു.
സംഭവത്തില്‍ കുറ്റ്യാടി പൊലിസ് കേസെടുത്തു.