മലപ്പുറം: കുറഞ്ഞ ചെലവില്‍ ഡെസ്‌ക് ടോപ്പ്, ലാപ്‌ടോപ്പ് കംപ്യൂട്ടറുകള്‍ നന്നാക്കുന്നതിന് ഉന്നത വിദ്യാഭ്യാസ വകുപ്പിന്റെ നൈപുണ്യ വികസന പദ്ധതിയായ അഡിഷണല്‍ സ്‌കില്‍ അക്വിസിഷന്‍സ് പ്രോഗ്രാമിന് (അസാപ്) കീഴില്‍ കുട്ടികള്‍ ഒരുങ്ങുന്നു. പ്രോജക്ട് സംരംഭ് എന്ന പദ്ധതിയുടെ കീഴിലാണ് ഇവര്‍ക്ക് ഇതിന് ആവശ്യമായ പരിശീലനം ലഭിച്ചത്.
2014-15 വര്‍ഷത്തില്‍ ബി.എസ്.എന്‍.എല്‍ നടത്തിയ പി.സി ഹാര്‍ഡ്‌വെര്‍ ആന്‍ഡ് നെറ്റ്‌വര്‍ക്ക് കോഴ്‌സ് കഴിഞ്ഞ അഞ്ചു കുട്ടികള്‍ ചേര്‍ന്നാണു കുറഞ്ഞ ചെലവില്‍ കംപ്യൂട്ടര്‍ സര്‍വീസിങ് നടത്തുന്നതിന് കമ്പനി രൂപീകരിച്ചിരിക്കുന്നത്. വയര്‍ ഓണ്‍ ടെക് എന്ന പേരില്‍ നടത്തുന്ന കമ്പനി പ്രാഥമിക ഘട്ടത്തില്‍ അസാപ്പിന്റെ കീഴിലുള്ള മുഴുവന്‍ സ്‌കൂളുകളിലെയും കംപ്യൂട്ടര്‍ അനുബന്ധ ഉപകരണങ്ങള്‍ കുറഞ്ഞ ചെലവില്‍ നന്നാക്കാനാണു തുടക്കമിടുന്നത്. തുടര്‍ന്നു കൂടുതല്‍ മേഖലകളിലേക്കു പ്രവര്‍ത്തനം വ്യാപിപ്പിക്കും. വയര്‍ ഓണ്‍ ടെക് കമ്പനിയുടെ ഔപചാരിക ഉദ്ഘാടനം 23നു രാവിലെ 10 നു കലക്ടറേറ്റ് സമ്മേളന ഹാളില്‍ പി. ഉബൈദുള്ള എം.എല്‍.എ നിര്‍വഹിക്കും. ജില്ലാ കലക്ടര്‍ എം. ഷൈനാമോള്‍, ഇന്‍സ്റ്റിറ്റ്യൂട്ട് ഓഫ് ജെം ആന്‍ഡ് ജ്വല്ലറി ഡയറക്ടര്‍ അബ്ദുസലാം. ടി പങ്കെടുക്കും.