ഇസ്ലാമാബാദ്: ഇന്ത്യന്‍ ടിവി, റേഡിയോ പരിപാടികള്‍ക്ക് വെള്ളിയാഴ്ച മുതല്‍ പാക്കിസ്താനില്‍ സമ്പൂര്‍ണ വിലക്ക്. പാക്കിസ്താന്‍ ഇലക്ട്രോണിക് മീഡിയ റെഗുലേറ്ററി അതോറിറ്റി (പിഇഎംആര്‍എ) യാണ് വിലക്കേര്‍പെടുത്തിയത്.

നിയമം ലംഘിക്കുന്നവരുടെ ലൈസന്‍സുകള്‍ ഷോകോസ് നോട്ടീസ് അയക്കാതെ തന്നെ റദ്ദാക്കാനും തുടര്‍നടപടികളെടുക്കാനും തീരുമാനിച്ചിട്ടുണ്ട്.

പാകിസ്താന്‍ സര്‍ക്കാരില്‍ നിന്നുള്ള സമ്മര്‍ദ്ദപ്രകാരമാണ് ഒക്ടോബര്‍ 21 മുതല്‍ ഇന്ത്യന്‍ ടി.വി ,റേഡിയോ പരിപാടികള്‍ക്ക് പി.ഇ.എം.ആര്‍.എ വിലക്കേര്‍പെടുത്തിയത്.

അതിര്‍ത്തിയില്‍ ഇന്ത്യ-പാക് ബന്ധം വഷളായതിന്റെ പശ്ചാത്തലത്തിലാണ് പുതിയ തീരുമാനമെന്നും പിഇഎംആര്‍എ അറിയിച്ചു. വെള്ളിയാഴ്ച വൈകീട്ട് മൂന്ന് മണി മുതലാണ് നിരോധനം നിലവില്‍ വരുക. വിദേശ ചാനലുകള്‍ പരമാവധി നിയന്ത്രിക്കാന്‍ മുന്‍പ് തന്നെ പാക്കിസ്ഥാന്‍ തീരുമാനിച്ചിരുന്നു.

പാകിസ്താനില്‍ സംപ്രേഷണം ചെയ്യുന്ന പരിപാടികളില്‍ ഇന്ത്യയുമായി ബന്ധപെട്ടവ ഒഴിവാക്കാനും കമ്മീഷന്‍ നിര്‍ദേശിച്ചിട്ടുണ്ട്.

2006 ല്‍ പാകിസ്താനില്‍ ഇന്ത്യന്‍ മാധ്യമങ്ങളുടെ സംപ്രേഷണത്തിനുള്ള വിലക്ക് നീക്കിയത് പര്‍വേസ് മുഷറഫിന്റെ നേതൃത്വത്തിലുള്ള പട്ടാള ഭരണകൂടമായിരുന്നു.