ശാസ്താംകോട്ട: ബൈക്കില്‍ മരണപ്പാച്ചില്‍ നടത്തി അപകടങ്ങള്‍ക്കിടയാക്കുന്നുവെന്ന നാട്ടുകാരുടെ പരാതിയുടെ അടിസ്ഥാനത്തില്‍ മോട്ടോര്‍ വാഹന വകുപ്പ് ഉദ്യോഗസ്ഥര്‍ വേഷം മാറിയെത്തി പന്ത്രണ്ടോളം കുട്ടി ഡ്രൈവര്‍മാരെ പിടികൂടി.
കൊല്ലം ആര്‍.ടി.ഒ ആര്‍. താജുദ്ദീന്‍പിള്ളയുടെ അനുമതിയോടെ വേഷം മാറിയെത്തിയ അസിസ്റ്റന്റ് മോട്ടോര്‍ വാഹന ഇന്‍പെക്ടര്‍ രാംജി .കെ. കരന്‍, സ്‌പെഷ്യല്‍ സ്‌ക്വാഡ് ബി .ശ്രീജിത്ത് എന്നിവരാണ് വാഹനങ്ങള്‍ പിടികൂടിയത്. പിടികൂടിയ വാഹനങ്ങള്‍ ശൂരനാട് പൊലിസ് സ്‌റ്റേഷനില്‍ സൂക്ഷിച്ചിരിക്കുകയാണ്. മാതാപിതാക്കളെ വിളിച്ച് വരുത്തി തുടര്‍ നടപടികള്‍ സ്വീകരിക്കും. പതാരം മേഖലയില്‍ മൂന്നാംകണ്ണ് നിരീക്ഷണ സംവിധാനം ആരംഭിച്ചതായും അപകടം ഉണ്ടാകുന്ന ഇത്തരം വാഹനങ്ങളുടെ വിവരങ്ങള്‍ ശേഖരിച്ച് കൊണ്ടിരിക്കുകയാണെന്നും സംഘം അറിയിച്ചു.
നേരിട്ടും അല്ലാതെയുമുള്ള വാഹന പരിശോധന ശക്തമാക്കുമെന്നും ആ മേഖലയിലെ സ്‌കൂള്‍ കുട്ടികള്‍ക്കും അധ്യാപകര്‍ക്കും റോഡ് സുരക്ഷാ പരിശീലനം നല്‍കുമെന്നും ജോയിന്റ് ആര്‍.ടി.ഒയുടെ ചുമതലയുള്ള മോട്ടോര്‍ വാഹന ഇന്‍സ്‌പെക്ടര്‍ എം. ജെ മനോജ് അറിയിച്ചു.