ജമ്മു: ജമ്മു കശ്മീരിലെ കത്വ ജില്ലയില്‍ സൈനികര്‍ നടത്തിയ തിരിച്ചടി ആക്രമണത്തില്‍ ഏഴ് പാക് സൈനികരും ഒരു തീവ്രവാദിയും കൊല്ലപ്പെട്ടതായി അതിര്‍ രക്ഷാ സേന (ബി.എസ്.എഫ്) പറഞ്ഞു.

ബുധനാഴ്ച രാത്രി ഹിരാനഗര്‍ സെക്ടറിലുണ്ടായ നുഴഞ്ഞുകയറ്റ ശ്രമം ബി.എസ്.എഫ് പരാജയപ്പെടുത്തിയിരുന്നു. എന്നാല്‍ ഇന്ന് അതിര്‍ത്തിയിലെ ബി.എസ്.എഫ് സേനയുടെ മേഖല ലക്ഷ്യമാക്കി പാക് സൈന്യം നീങ്ങിയതോടെയാണ് സൈന്യം തിരിച്ചടിച്ചത്.

ഇന്നു രാവിലെ പാക് സൈന്യം നടത്തിയ വെടിവയ്പ്പില്‍ ഒരു ബി.എസ്.എഫ് ജവാന് ഗുരുതരമായ പരുക്കേറ്റിട്ടുണ്ട്. ഹിരാനഗര്‍ സെക്ടറില്‍ കഴിഞ്ഞ നാലുദിവസമായി ഇന്ത്യ- പാക് സൈന്യങ്ങള്‍ തമ്മില്‍ വെടിയുതിര്‍ത്തു വരികയായിരുന്നു.

അതിര്‍ത്തിയിലെ സംഭവത്തെത്തുടര്‍ന്ന് ആഭ്യന്തര മന്ത്രി രാജ്‌നാഥ് സിങ് ഉന്നതതല യോഗം വിളിച്ചിട്ടുണ്ട്. അതിര്‍ത്തി അതീവ ജാഗ്രതയിലാണ്.