കായംകുളം: റോഡിലെ കുഴിയില്‍ വീഴാതിരിക്കാന്‍ വെട്ടിച്ച ബൈക്കില്‍ ലോറിയിടിച്ച് രണ്ടു പേര്‍ മരിച്ചു. കുറ്റിത്തെരുവ് ദേശത്തിനകം പന്തപ്ലാവില്‍ ലക്ഷംവീട്ടില്‍ രമണന്റെ മകന്‍ രജ്ഞിത്ത് (21) പുള്ളിക്കണക്ക് കല്ലേലില്‍ താഹാ കുഞ്ഞിന്റെ മകന്‍ ഫൈസല്‍ (21) എന്നിവരാണു മരിച്ചത്.

ദേശീയ പാതയില്‍ എം.എസ്.എം കോളജിനു സമീപം രാത്രി 10 മണിയോടെയായിരുന്നു അപകടം. കായംകുളത്തു നിന്നു വടക്കോട്ടു പോവുകയായിരുന്ന ഇവര്‍ റോഡിലെ കുഴിയില്‍ വീഴാതിരിക്കാന്‍ ബൈക്ക് വെട്ടിക്കവെ പിന്നാലെ തടി കയറ്റി വന്ന ടോറസ് ലോറി ഇടിക്കുകയായിരുന്നു. ഇവരെ ഇടിച്ചിട്ടശേഷം നിര്‍ത്താതെ പോയ ലോറി പൊലിസ് പിന്തുടര്‍ന്നെത്തി കരീലകുളങ്ങരയില്‍ വച്ച് പിടികൂടി. മൃതദേഹങ്ങള്‍ താലൂക്ക് ആശുപത്രി മോര്‍ച്ചറിയില്‍.