കൊല്ലം: പട്ടത്താനം ഗവ.എസ്.എന്‍.ഡി.പി യു.പി.സ്‌കൂളിലെ പ്രഥമ അധ്യാപകന് നാളെ പട്ടത്താനം പൗരാവലി സ്‌നേഹാദരം നല്‍കുമെന്ന് സംഘാടകര്‍ വാര്‍ത്താ സമ്മേളനത്തിലറിയിച്ചു.
2007ല്‍ ആര്‍.രാധാകൃഷ്ണന്‍ പ്രഥമാധ്യാപകനായി ചുമതലയേറ്റത് മുതല്‍ സ്‌കൂളിനെ മികവിലേക്ക് പടുത്തുയര്‍ത്തി. കുട്ടികളുടെ പങ്കാളിത്തത്തോടെ ഉരുകുന്ന ഭൂമിക്കൊരു സാന്ത്വനം എന്ന ഹൃസ്വചിത്രം സ്‌കൂള്‍ നിര്‍മിച്ചു. 2007-2008 ല്‍ എസ്.എസ്.എ. സംസ്ഥാനത്തെ മികച്ച വിദ്യാലയമായി തെരഞ്ഞെടുത്തു. ഡി.സി.സി.ബുക്‌സിന്റെ കുഞ്ഞുണ്ണി മാഷ് വിദ്യാലയ പുരസ്‌കാരം, ബ്രിട്ടീഷ് കൗണ്‍സിലിന്റെ ഇന്റര്‍നാഷണല്‍ സ്‌കൂള്‍ അവാര്‍ഡ്,പി.ടി.എ.യ്ക്കുള്ള അവാര്‍ഡ് ഐ.എസ്.ആര്‍.ഒ.യുടെ 2005 ലെ ബെസ്റ്റ് സ്‌കൂള്‍ അവാര്‍ഡിനായി തെരഞ്ഞെടുത്തതും ഈ സ്‌കൂളിനെയാണ്.
യു.പി.സ്‌കൂള്‍ കുട്ടികള്‍ക്കായി ബിനാലെ സംഘടിപ്പിച്ചതും എണ്‍പതുകളിലെ കേരളത്തിന്റെ ഗ്രാമ പുനഃസൃഷ്ടിയായ മഞ്ചാടിക്കുന്ന് ഡോട്ട് കോം ഒരുക്കിയതും ഈ നിര്‍ണായക ചുവടുകള്‍ക്ക് നെടുനായകത്വം വഹിച്ച ആര്‍.രാധാകൃഷ്ണനെതേടി 2013 ല്‍ മികച്ച അധ്യാപകനുള്ള സംസ്ഥാന സര്‍ക്കാര്‍ പുരസ്‌കാരവും 2015 ല്‍ മികച്ച അധ്യാപകനുള്ള ദേശീയ പുരസ്‌കാരവും എത്തി. പത്രസമ്മേളനത്തില്‍ പ്രേം ഉഷാര്‍, ചന്ദ്രബാലന്‍, പ്രമോദ് ബോസ്, അനിലാല്‍, ചന്ദ്രസേനന്‍ എന്നിവര്‍ പങ്കെടുത്തു.