പേരാമ്പ്ര: നടുക്കണ്ടി പാറയില്‍ സാമൂഹ്യവിരുദ്ധരുടെ അഴിഞ്ഞാട്ടം. ഇവിടെ നിന്നും കൊമ്പത്തത്ത് ഭാഗത്തേക്കുള്ള റോഡിലെ സ്വകാര്യവ്യക്തിയുടെ ഉടമസ്ഥതയിലുള്ള പറമ്പിന്റെ മതില്‍ മൂന്നിടങ്ങളില്‍ തകര്‍ത്ത നിലയിലാണ്.
കോണ്‍ക്രീറ്റ് ചെയ്ത ഭാഗം കുത്തിപ്പൊളിച്ചാണ് തകര്‍ത്തത്. വാളൂരിലെ തരിപ്പമ്മല്‍ മുഹമ്മദിന്റെ ഉടമസ്ഥതയിലുള്ള സ്ഥലത്തെ മതിലാണ് സാമൂഹ്യവിരുദ്ധര്‍ തകര്‍ത്തത്. കഴിഞ്ഞദിവസം അര്‍ധരാത്രിയാണ് മതില്‍ തകര്‍ത്തത്.
 തൊട്ടടുത്തെ പുത്തലത്ത് അസ്സയിനാറുടെ വീട്ടുപറമ്പിലും റോഡിലും പ്ലാസ്റ്റിക് പാഴ് വസ്തുക്കളും നിക്ഷേപിച്ചിട്ടുണ്ട്. കൊമ്പത്തത്ത്താഴ പാടശേഖരത്തില്‍ കൃഷിയിറക്കിയ വാഴകള്‍ ചവിട്ടിയൊടിക്കുന്നതും വയലുകളില്‍ മദ്യക്കുപ്പികള്‍ പൊട്ടിച്ച് വലിച്ചെറിയുന്നതും പതിവായിട്ടുണ്ട്. രണ്ടു ദിവസം മുന്‍പ് പൊലിസില്‍ വിവരമറിയിച്ച് ഇവ നീക്കംചെയ്തിരുന്നു. രാത്രികാലങ്ങളില്‍ മദ്യപാനികളുടെ അഴിഞ്ഞാട്ടവും ഇവിടെ വ്യാപകമാണ്. മതില്‍ തകര്‍ത്ത സംഭവത്തില്‍ ഉടമ പേരാ മ്പ്ര പൊലിസില്‍ പരാതി നല്‍കി.