സുല്‍ത്താന്‍ ബത്തേരി: വരള്‍ച്ച പ്രതിരോധ പ്രവര്‍ത്തനങ്ങളുടെ ഭാഗമായി രണ്ടാഴ്ച്ച മുമ്പ് നിര്‍മിച്ച ചെ്ക്കുഡാമിലേക്ക് കക്കൂസ് മാലിന്യം അടക്കം ഒഴുക്കിയതായി പരാതി. ബത്തേരി നഗരസഭയിലെ മൈതാനിക്കുന്നില്‍ ജനകീയ കമ്മിറ്റി നിര്‍മിച്ച ചെക്കുഡാമിലേക്കാണ് കഴിഞ്ഞദിവസം മാലിന്യം ഒഴുക്കിയത്. തോട് കടുവരുന്ന അമ്മായിപ്പാലം ഭാഗത്തുനിന്നുള്ള ഫ്‌ളാറ്റുകളില്‍ നിന്നും മത്സ്യമാര്‍ക്കറ്റില്‍ നിന്നുള്ള മാലിന്യങ്ങളുമാണ് ചെക്ക്ഡാമില്‍ കെട്ടികിടക്കുന്നത്്. ഇതിനുപുറമെ സര്‍വിസ് സ്റ്റേഷനില്‍ നിന്നുള്ള മാലിന്യങ്ങളും വെള്ളത്തില്‍ കെട്ടിനില്‍ക്കുന്നുണ്ട്. പ്രദേശത്ത് അസഹനീയമായ ദുര്‍ഗന്ധവുമുണ്ട്. മാലിന്യം വെള്ളത്തില്‍ കലര്‍ന്നതോടെ മത്സ്യങ്ങളും ഞണ്ടുകളും ചത്തുപൊന്തിയിട്ടുണ്ട്. ഈ വെള്ളമാണ് പ്രദേശവാസികള്‍ കുളിക്കാനും മറ്റും ഉപയോഗിക്കുന്നത്. ഡാമിന് സമീപത്ത് നിരവധി കുടിവെള്ള കിണറുകളും സ്ഥിതി ചെയ്യുന്നുണ്ട്. സംഭവത്തില്‍ കുറ്റക്കാര്‍ക്കെതിരെ നടപടി സ്വീകരിക്കണമെന്ന് ആവശ്യപെട്ട് ആരോഗ്യ വകുപ്പിനും ബത്തേരി മുന്‍സിപ്പാലിറ്റിക്കും നാട്ടുകാര്‍ പരാതി നല്‍കിയിട്ടുണ്ട്.