പള്ളിക്കല്‍: ദേശീയപാതയില്‍ കാക്കഞ്ചേരിക്കടുത്തു വാഹനങ്ങള്‍ കൂട്ടിയിടിച്ചു. അപകടത്തെ തുടര്‍ന്നു മണിക്കൂറുകളോളം ഗതാതഗം തടസപ്പെട്ടു. തേഞ്ഞിപ്പലം എ.എസ്.ഐ വത്സന്റെ നേതൃത്വത്തിലെത്തിയ പൊലിസ് അപകടത്തില്‍പെട്ട വാഹനങ്ങള്‍ മാറ്റി മണിക്കുറുകള്‍ക്കു ശേഷമാണ് ഗതാഗതം പുനഃസ്ഥാപിച്ചത്.
കാക്കഞ്ചേരിയില്‍നിന്നു രാമനാട്ടുകര ഭാഗത്തേക്കുള്ള ഹെയര്‍പിന്‍ വളവില്‍ ഇന്നലെ ഉച്ചയോടെയാണ് സംഭവം. കെ.എസ്.ആര്‍.ടി.സിയും രണ്ട് കാറുകളും തമ്മിലാണ് കൂട്ടിയിടിച്ചത്. അപകടത്തില്‍ ആര്‍ക്കും പരുക്കില്ല. ചേളാരി ഭാഗത്തുനിന്നു കോഴിക്കേട്ടേക്കു പോകുന്ന കോഴിക്കോട് സ്വദേശിയുടെ കാര്‍ എതിരേവന്ന ബൈക്കിനെ രക്ഷിക്കാനായി വലതുഭാഗത്തേക്ക് വെട്ടിച്ചതില്‍ കോഴിക്കോട് ഭാഗത്തുനിന്നു തിരൂരങ്ങാടിയിലേക്ക് പോകുന്ന തിരൂരങ്ങാടി താലൂക്കാശുപത്രിയിലെ ഡോക്ടര്‍ അനൂപിന്റെ കാറില്‍ ഇടിക്കുകയായിരുന്നു. ഇടിയുടെ ആഘാതത്തില്‍ റോഡില്‍ വട്ടംതിരിഞ്ഞ കാര്‍ തൊട്ടുപിന്നാലെയെത്തിയ കെ.എസ്.ആര്‍.ടി.സി ബസില്‍ ഇടിച്ചു. തേഞ്ഞിപ്പലം പൊലിസ് കേസെടുത്തു.