പുലാമന്തോള്‍: നഗരത്തിലെ ഏക ബസ് കാത്തിരിപ്പുകേന്ദ്രം അപകട ഭീഷണിയാകുന്നു. പെരിന്തല്‍മണ്ണ റോഡില്‍ സ്ഥിതിചെയ്യുന്ന വര്‍ഷങ്ങള്‍ പഴക്കമുള്ള  ബസ് കാത്തിരിപ്പ് കേന്ദ്രമാണ് ഏതുസമയവും യാത്രക്കാരുടെ  തലയില്‍ പതിക്കുമെന്ന നിലയില്‍ തകര്‍ച്ചയിലായിട്ടുള്ളത്.
വര്‍ഷങ്ങള്‍ക്കു മുന്‍പ് പുലാമന്തോള്‍ ബസ് സ്റ്റാന്‍ഡ് നിര്‍മാണത്തെത്തുടര്‍ന്ന് ഈ കാത്തിരിപ്പു കേന്ദ്രം പൊളിച്ചുനീക്കുമെന്ന് പറഞ്ഞിരുന്നുവെങ്കിലും ചില എതിര്‍പ്പിനെ തുടര്‍ന്ന് നിലനിര്‍ത്തുകയായിരുന്നുവത്രെ. എന്നാല്‍ വൃദ്ധരും സ്ത്രീകളുമടക്കം നൂറുകണക്കിനാളുകള്‍ ബസ് കാത്തുനില്‍ക്കുന്ന ഈ ഷെഡില്‍ ഇരിപ്പിടമോ മറ്റോ ഇന്നുവരെയും സ്ഥാപിച്ചിട്ടില്ല.
കഴിഞ്ഞ ദിവസത്തെ കാറ്റില്‍  മുകളിലെ തകര മേല്‍ക്കൂര അടര്‍ന്നുപോയിരുന്നു. ടൗണ്‍ നവീകരണത്തിന്റെ ഭാഗമായി  അരികിലെ മണ്ണ് നീക്കം ചെയ്തതിലൂടെ ഏതുനേരവും വീഴാവുന്ന അവസ്ഥയിലാണ് കാത്തിരിപ്പ് കേന്ദ്രം.
 മാറ്റിസ്ഥാപിക്കുകയോ അല്ലെങ്കില്‍ പൊളിച്ചു  പുതുക്കിപ്പണിയുകയോ ചെയ്തില്ലെങ്കില്‍  ബസ് കാത്തിരിപ്പ് കേന്ദ്രം യാത്രക്കാരുടെ ജീവനു തന്നെ ഭീഷണിയാകുന്ന അവസ്ഥയാണുള്ളത്.