തൃപ്രയാര്‍: വലപ്പാട് ഗവ. ഹയര്‍ സെക്കന്‍ഡറി സ്‌കൂളിന്റെ മട്ടുപ്പാവില്‍ ആയിരം ഗ്രോബാഗുകളിലായി പച്ചക്കറികള്‍ വിളയും. സാധാരണ പച്ചക്കറികള്‍ക്ക് പുറമേ റാഡിഷ്, ബീറ്റ്‌റൂട്ട്, കാരറ്റ്, മല്ലിചെപ്പ്, കാബേജ്, കോളിഫ്‌ളവര്‍ ഉള്‍പ്പെടെയാണ് ഇന്നലെ ഗ്രോബാഗുകളില്‍ നട്ടത്. മുഴുവന്‍ ഗ്രോബാഗുകളിലും ചാണകവും മണ്ണം ചകിരിച്ചോറും മണ്ണിര കമ്പോസ്റ്റും നിറച്ചാണ് തൈകള്‍ നട്ടത്.
മട്ടുപ്പാവില്‍ ആയിരം ഗ്രോബാഗുകളില്‍ പച്ചക്കറികൃഷി നടത്തുന്ന ജില്ലയിലെ ആദ്യത്തെ ഗവ. ഹയര്‍ സെക്കന്‍ഡറി സ്‌കൂളും വലപ്പാട് സ്‌കൂളാണെന്ന് സ്‌കൂള്‍ അധികൃതര്‍ പറഞ്ഞു. വലപ്പാട് ഗ്രാമപഞ്ചായത്ത് ഫണ്ട് ഉപയോഗിച്ചാണ് ഗ്രോബാഗുകള്‍ വാങ്ങിയത്. ഗീത ഗോപി എം.എല്‍.എ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്റ് ഇ.കെ തോമസ് മാസ്റ്റര്‍ അധ്യക്ഷനായിരുന്നു.