തിരുവനന്തപുരം: സംസ്ഥാനത്ത് പുതിയതായി 32 മാവേലി സ്റ്റോറുകള്‍ ആരംഭിക്കുമെന്ന് മന്ത്രി പി. തിലോത്തമന്‍. സപ്ലൈക്കോ ജീവനക്കാരുടെ ശമ്പളപരിഷ്‌ക്കരണം സര്‍ക്കാരിന്റെ സജീവപരിഗണനയിലാണ്. ഇതിലൂടെ പ്രതിമാസം 46.63 ലക്ഷം രൂപ അധികബാധ്യത വരും.
സംസ്ഥാനത്തെ കാലപ്പഴക്കം ചെന്ന കുടിവെള്ള പൈപ്പ് ലൈന്‍ മാറ്റി സ്ഥാപിക്കുന്നതിന് 526 കോടി രൂപയുടെ പദ്ധതി തയാറാക്കിയിട്ടുണ്ടെന്ന് മന്ത്രി മാത്യു ടി.തോമസ് നിയമസഭയെ അറിയിച്ചു. കിഫ്ബിയില്‍ ഉള്‍പ്പെടുത്തി പദ്ധതി നടപ്പാക്കും.
ഇതിനായി 50 കോടി രൂപ നീക്കിവച്ചിട്ടുണ്ടെന്നും മന്ത്രി പറഞ്ഞു. തിരുവനന്തപുരം, കൊച്ചി, കോഴിക്കോട് ജില്ലകളില്‍ പ്രത്യേക ഡി അഡിക്ഷന്‍ സെന്ററുകള്‍ സ്ഥാപിക്കുമെന്ന് മന്ത്രി ടി.പി രാമകൃഷ്ണന്‍ അറിയിച്ചു. ഇതില്‍ ഒരെണ്ണം ഉടന്‍ പ്രവര്‍ത്തനമാരംഭിക്കുമെന്നും മന്ത്രി വ്യക്തമാക്കി.