താമരശ്ശേരി:  കേരളഗ്രന്ഥശാല സംഘം സംസ്ഥാന പുരസ്‌കാര ജേതാവും ആറുപതിറ്റാണ്ടണ്ട് കാലം താമരശ്ശേരി ലൈബ്രറിയുടെ സെക്രട്ടറി, പ്രസിഡന്റ് പദവികള്‍ വഹിക്കുകയും ചെയ്ത പി.കെ.ജി വാര്യര്‍ മാസ്റ്ററുടെ ഒന്നാം ചരമവാര്‍ഷികത്തോടനുബന്ധിച്ച് വിവിധ പരിപാടികള്‍ ഇന്ന്  നടക്കും. താമരശേരി സൗഹൃദവേദിയും പ്രസ്‌ക്ലബും ചേര്‍ന്ന് ലൈബ്രറി പരിസരത്ത് വച്ചാണ് പരിപാടികള്‍ സംഘടിപ്പിക്കുന്നത്.
രാവിലെ 10 മണിക്ക് ലൈബ്രറി ഹാളില്‍ അജയന്‍ കാരാടിയുടെ ചിത്ര പ്രദര്‍ശനം നാടകകൃത്ത് ഹുസൈന്‍ കാരാടി ഉദ്ഘാടനം ചെയ്യും.
 മൂന്നുമണിക്ക് നടക്കുന്ന മാധ്യമ സെമിനാറില്‍ മാധ്യമ സ്വാതന്ത്ര്യം; സാധ്യതയും പരിമിതിയും എന്ന വിഷയം കേരള പ്രസ്സ് അക്കാദമി മുന്‍ ചെയര്‍മാന്‍ എന്‍.പി രാജേന്ദ്രന്‍ അവതരിപ്പിക്കും.
അഞ്ചുമണിക്ക് നടക്കുന്ന അനുസ്മരണ സമ്മേളനം സാഹിത്യകാരന്‍ പി.ആര്‍ നാഥന്‍ ഉദ്ഘാടനം ചെയ്യും. ഗ്രാമപഞ്ചായത്ത് പ്രസിഡന്റ് കെ.സരസ്വതി, മുന്‍ എം.എല്‍.എമാരായ സി.മോയിന്‍കുട്ടി, വി.എം ഉമ്മര്‍മാസ്റ്റര്‍, സാമൂഹ്യ രാഷ്ട്രീയ നേതാക്കള്‍ സംബന്ധിക്കും. 6.30ന് നടക്കുന്ന കലാസന്ധ്യയില്‍ ആലപ്പുഴ തസ്ബിയന്‍ തിയേറ്റേഴ്‌സ് അവതരിപ്പിക്കുന്ന ഏകപാത്ര നാടകം ജോസഫിന്റെ റേഡിയോയും തുടര്‍ന്ന് നടക്കുന്ന ഗാനാഞ്ജലിയില്‍ ഗായകരായ സി.ജി സുമേഷ് , ഉണ്ണിമായ, സതീഷ് തേവള്ളി, രശ്മിരാമന്‍ ,കെപി കൃഷ്ണന്‍ എന്നിവര്‍ പഴയകാല പാട്ടുകള്‍ ആലപിക്കും.