ദമസ്‌കസ്: സിറിയയിലെ ഇദ്‌ലിബ് പ്രവിശ്യയിലെ ഹാസ് ഗ്രാമത്തില്‍ വിവിധയിടങ്ങളിലായി കഴിഞ്ഞ ദിവസം നടന്ന വ്യോമാക്രമണത്തില്‍ കൊല്ലപ്പെട്ടത് 28 പേര്‍. ഇതില്‍ 22 പേര്‍ വിദ്യാര്‍ഥികളും ആറു പേര്‍ അധ്യാപകരുമാണ്.
ഗ്രാമത്തില്‍ മൂന്നു സ്‌കൂളുകള്‍ കേന്ദ്രീകരിച്ചാണ് വ്യോമാക്രമണം നടന്നത്. ആക്രമണത്തിനു പിന്നില്‍ റഷ്യന്‍ ട്രൂപ്പുകളാണെന്നാണ് നിഗമനം. തീവ്രവാദി ആക്രമണമെന്നാണ് സംഭവത്തെ സിറിയന്‍ സ്റ്റേറ്റ് മീഡിയ വിശേഷിപ്പിച്ചത്.
അതേസമയം, ആക്രമണത്തില്‍ തങ്ങളുടെ സൈനികര്‍ക്കു പങ്കില്ലെന്നാണ് വിശ്വാസമെന്നും ആക്രമണം അപലപനീയമാണെന്നും റഷ്യന്‍ യു.എന്‍ അംബാസിഡര്‍ വിറ്റലി ചര്‍ക്കിന്‍ പറഞ്ഞു.