തൃക്കരിപ്പൂര്‍: എസ്.കെ.എസ്.എസ്.എഫ്, എസ്.വൈ.എസ് മെട്ടമ്മല്‍ യൂനിറ്റ് സംയുക്തമായി സംഘടിപ്പിക്കുന്ന തസ്‌ലിയ പലിശ രഹിത പദ്ധതിയുടെ ഒന്നാം വാര്‍ഷികവും മജ്‌ലിസുന്നൂറും ഇന്നു തുടങ്ങും. മെട്ടമ്മല്‍ ജുമാമസ്ജിദ് ഖത്തീബ് കെ.ടി അബ്ദുല്ല മുസ്‌ലിയാരുടെ നേതൃത്വത്തില്‍ ഖബര്‍ സിയാറത്തോടെ പരിപാടിക്ക് തുടക്കമാകും. എ.ജി അബ്ദുല്‍ ജബ്ബാര്‍ ഹാജി പതാക ഉയര്‍ത്തും.
വൈകീട്ട് ഏഴിനു എന്‍ കുഞ്ഞിമൊയ്തീന്‍ ഹാജി നഗറില്‍ പ്രഭാഷണ പരിപാടി അബ്ദുറഷീദ് സഅദി ഉദ്ഘാടനം ചെയ്യും. സിറാജുദ്ദീന്‍ ദാരിമി കക്കാട് സൈബര്‍ ലോകവും യുവത്വവും എന്ന വിഷയത്തില്‍ പ്രഭാഷണം നടത്തും. നാളെ ഏഴിന് സുബൈര്‍ ദാരിമി ഉദ്ഘാടനം ചെയ്യുന്ന പ്രഭാഷണ പരിപാടിയില്‍ ആബിദ് ഹുദവി തച്ചണ്ണ പ്രഭാഷണം നടത്തും. 30ന് ഏഴിന് നടക്കുന്ന ചടങ്ങ് താജുദ്ദീന്‍ ദാരിമി പടന്ന ഉദ്ഘാടനം ചെയ്യും. തുടര്‍ന്ന് സുബൈര്‍ മാസ്റ്റര്‍ തോട്ടിക്കലിന്റെ കഥാപ്രസംഗം. 31നു എസ്.കെ.എസ്.എസ്.എഫ് സംസ്ഥാന സെക്രട്ടറി സത്താര്‍ പന്തല്ലൂര്‍ മുഖ്യപ്രഭാഷണം ചെയ്യും. ചുഴലി മുഹ്‌യദ്ദീന്‍ മൗലവി ഉദ്ഘാടനം ചെയ്യും. തുടര്‍ന്ന് നടക്കുന്ന മജ്‌ലിസുന്നൂറിന് സയ്യിദ് നജ്മുദ്ദീന്‍ പൂക്കോയതങ്ങള്‍ യമാനി അല്‍ ഹൈദ്രോസി മംഗളൂരു നേതൃത്വം നല്‍കും.