ന്യൂഡല്‍ഹി: തെരഞ്ഞെടുപ്പ് പ്രചാരണപ്രസംഗങ്ങളില്‍ നിന്ന് മതങ്ങളെ പരാമര്‍ശിക്കുന്നത് പൂര്‍ണമായി നിരോധിക്കാനാവില്ലെന്ന് സുപ്രിം കോടതി. രാഷ്ട്രീയ പ്രസംഗങ്ങളില്‍ പറയാവുന്നത്, പറയാനാവാത്തത് എന്നിങ്ങനെ വേര്‍തിരിച്ച് പട്ടിക തയാറാക്കാന്‍ സാധ്യമല്ലെന്നും പകരം അതിന്റെ സന്ദര്‍ഭത്തിന്റെ അടിസ്ഥാനത്തില്‍ വിലയിരുത്തുകയാണു വേണ്ടതെന്നും സുപ്രിം കോടതി അഭിപ്രായപ്പെട്ടു. 1995ലെ ഹിന്ദുത്വം സംബന്ധിച്ച കേസ് പരിഗണിക്കവെയാണ് ചീഫ് ജസ്റ്റിസ് ടി.എസ് താക്കൂര്‍ അധ്യക്ഷനായ സുപ്രിം കോടതിയുടെ ഏഴംഗ ഭരണഘടനാ ബെഞ്ച് ഇങ്ങനെ അഭിപ്രായപ്പെട്ടത്. രാഷ്ട്രീയ പ്രസംഗങ്ങളില്‍ മതം പറയാന്‍ പാടില്ലെന്ന് ടീസ്ത സെതല്‍വാദിനു വേണ്ടി ഹാജരായ ഇന്ദിരാ ജയ്‌സിങ് ആവശ്യപ്പെട്ടപ്പോഴായിരുന്നു കോടതിയുടെ പരാമര്‍ശം. മതം രാഷ്ട്രീയത്തില്‍ നിന്ന് മാറ്റിനിര്‍ത്തണോ വേണ്ടയോ എന്ന കാര്യം ഇപ്പോള്‍ പരിഗണിക്കുന്നില്ലെന്നും കോടതി പറഞ്ഞു.
മതത്തെയും രാഷ്ട്രീയത്തെയും വേര്‍തിരിച്ചുള്ള വര വരയ്ക്കാന്‍ പ്രയാസമാണെങ്കിലും മതേതരത്വം മുന്‍നിര്‍ത്തി അത്തരമൊരു വര അനിവാര്യമാണെന്ന് ഇന്ദിരാ ജയ്‌സിങ് പറഞ്ഞു. മതത്തിന്റെ പേരില്‍ സ്ഥാനാര്‍ഥിയോ അയാളുടെ പ്രതിനിധിയോ വോട്ടുചോദിക്കുന്നത് ജനപ്രാതിനിധ്യ നിയമത്തിലെ 123 (3) വകുപ്പിന്റെ ലംഘനമാണോ അല്ലയോ എന്ന കാര്യം മാത്രമാണ് ഈ ഘട്ടത്തില്‍ പരിശോധിക്കുന്നതെന്ന് കോടതി ആവര്‍ത്തിച്ചു. രാഷ്ട്രീയ പ്രസംഗങ്ങളില്‍ നിന്ന് മതത്തെ പൂര്‍ണമായും മാറ്റി നിര്‍ത്തണമെന്നാണ് നിങ്ങള്‍ ആവശ്യപ്പെടുന്നത്. രാഷ്ട്രീയ പ്രസംഗത്തില്‍ മതംപറയാമോ എന്ന കാര്യം ഇപ്പോള്‍ പരിഗണിക്കുന്നേയില്ലെന്നും കോടതി വ്യക്തമാക്കി.