പെരുമ്പാവൂര്‍: സാമൂഹ്യ പ്രവര്‍ത്തനം തങ്ങളുടെ പഠന പ്രവര്‍ത്തനത്തിന്റെ ഭാഗമാണെന്ന് തെളിയിച്ച് തണ്ടേക്കാട് ജമാഅത് ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥികള്‍. സ്‌കൂളിലെ എന്‍.എസ്.എസ് യൂണിറ്റിന്റെ ദത്ത് ഗ്രാമമായ കുട്ടമ്പുഴ പഞ്ചായത്തിലെ മേട്‌ന പാറ ആദിവാസി കുടിയില്‍ യൂണിറ്റിന്റെ നേതൃത്വത്തില്‍ 21 വിധവകള്‍ക്ക് പുതപ്പും വസ്ത്രങ്ങളും വിതരണം ചെയ്തു. ലഹരി വിരുദ്ധ ശുചിത്വ ബോധവല്‍ക്കരണ പ്രവര്‍ത്തനങ്ങളുടെ ഭാഗമായി നേര്‍വഴികള്‍ എന്ന പേരില്‍ കുട്ടികള്‍ അവതരിപ്പിച്ച തെരുവ് നാടകം വീക്ഷിക്കാന്‍ കുടിയിലെ മുഴുവന്‍ ആളുകളും എത്തിചേര്‍ന്നിരുന്നു.
ശുചിത്വമിഷന്റെ ലഘുലേഖകള്‍ സ്വച്ച് ഭാരത് ക്യാംപയിന്റെ ഭാഗമായി വിതരണം ചെയ്തു.കുടിയിലെ മൂപ്പന്‍ രാജു മണി പരിപാടികള്‍ ഉദ്ഘാടനം ചെയ്തു.എന്‍ .എസ്.എസ് ജില്ല പ്രോഗ്രാം ഓഫിസര്‍ ബിനോയ് കെ.ജോസഫ്, പ്രോഗ്രാം കോഓര്‍ഡിനേറ്റര്‍ കെ.എ.നൗഷാദ്, വിദ്യാര്‍ഥി പ്രതിനിധികളായ ഹനാന്‍ ഫൗസിയ, ദില്‍ബര്‍, മുഹമ്മദ് സ്വഫ് വാന്‍, നൗറഫാത്തിമ എന്നിവര്‍ നേതൃത്വം നല്‍കി.