മലയിന്‍കീഴ്: വിളപ്പില്‍ശാല  കാരോട് ക്ഷീരസംഘം തെരഞ്ഞെടുപ്പില്‍ സി.പി.എമ്മും കോണ്‍ഗ്രസും കൈകോര്‍ക്കുന്നു. ബി.ജെ.പിയില്‍നിന്നു ഭരണം തിരിച്ചുപിടിക്കലാണ് ലക്ഷ്യം.
 അടുത്ത മാസം 11നാണു തെരഞ്ഞെടുപ്പ്. ആറു പതിറ്റാണ്ടോളം  സംഘത്തിന്റെ ഭരണം കയ്യാളിയിരുന്ന കോണ്‍ഗ്രസില്‍നിന്നു 2011 ലാണു ബി.ജെ.പിയുടെ ഡി.കര്‍മചന്ദ്രന്റെ നേതൃത്വത്തിലുള്ള ക്ഷീരകര്‍ഷക സഹകരണ മുന്നണി ആദ്യമായി ഭരണം പിടിച്ചെടുത്തത്. അന്നു കോണ്‍ഗ്രസിനു സി.പി.എം രഹസ്യ പിന്തുണയാണു
നല്‍കിയിരുന്നത്. എന്നാല്‍ ഒന്‍പതംഗ ഭരണസമിതിയില്‍ കോണ്‍ഗ്രസില്‍നിന്ന്  ഒരാള്‍ക്കുപോലും ജയിക്കാനായില്ല. ഇത്തവണ പരസ്യ ധാരണയുണ്ടാക്കിയാണ് ഇവര്‍ തെരഞ്ഞെടുപ്പിനെ നേരിടുന്നത്.
കോണ്‍ഗ്രസിലെ ആറുപേരും സി.പി.എമ്മിലെ മൂന്നുപേരും അടങ്ങുന്ന ഒന്‍പതംഗ പാനലാണു നാമനിര്‍ദേശ പത്രിക സമര്‍പ്പിച്ചത്. സി.പി.എമ്മിനുള്ളില്‍ ആദ്യം എതിര്‍പ്പുയര്‍ന്നെങ്കിലും പിന്നീട് ബി.ജെ.പിക്കെതിരേ ഒന്നിക്കാന്‍ തീരുമാനിക്കുകയായിരുന്നു.
1955ല്‍ പ്രവര്‍ത്തനം തുടങ്ങിയ കാരോട് ക്ഷീരസംഘം 1985ല്‍ മില്‍മയുടെ നിയന്ത്രണത്തിലായി. ജില്ലയിലെതന്നെ മികച്ച ക്ഷീരസഹകരണ സംഘങ്ങളിലൊന്നാണിത്.