മലപ്പുറം: നടപ്പുസാമ്പത്തിക വര്‍ഷം ആരംഭിച്ച് ആറ് മാസങ്ങള്‍ പിന്നിട്ടിട്ടും പദ്ധതി തുക വിനിയോഗിക്കുന്നതില്‍ അലംഭാവം കാണിച്ച് സംസ്ഥാനത്തെ തദ്ദേശ സ്ഥാപനങ്ങള്‍. ഇതിനകം ചിലവഴിച്ചത് വാര്‍ഷിക പദ്ധതിയുടെ 8.13 ശതമാനം മാത്രമാണ്. മൊത്തം പദ്ധതി തുകയില്‍ നിന്നും 379.63 കോടി മാത്രമാണ് ഈ മാസം 22 വരെ സംസ്ഥാനത്തെ തദ്ദേശ സ്ഥാപനങ്ങള്‍ ചെലവഴിച്ചിട്ടുള്ളത്.
ഏറ്റവും കൂടുതല്‍ തുക ചെലവഴിച്ചത് ആലപ്പുഴ ജില്ലയിലാണ്. മൊത്തം പദ്ധതി തുകയുടെ 12.60 ശതമാന(37.18 കോടി)മാണ് ജില്ലയില്‍ ചെലവഴിച്ചിട്ടുള്ളത്. തൃശൂര്‍ ജില്ലയാണ് ഏറ്റവും പിറകിലുള്ളത്. 3.85 ശതമാ(16.48 കോടി)നമാണ് തൃശൂര്‍ ജില്ല ചെലവഴിച്ചിട്ടുള്ളത്. തിരുവനന്തപുരം ജില്ല(8.83 ), കൊല്ലം(7.94), പത്തനംതിട്ട(8.21), കോട്ടയം(4.99), ഇടുക്കി(11.50), എറണാകുളം(6.26), പാലക്കാട്(9.71), മലപ്പുറം(8.04), കോഴിക്കോട്(8.86), വയനാട്(4.81), കണ്ണൂര്‍(9.07), കാസര്‍കോട്(10.02) എന്നിങ്ങനെയാണ് മറ്റു ജില്ലകള്‍ ചിലവിട്ട തുകയുടെ ശതമാനക്കണക്ക്.    
     നടപ്പുസാമ്പത്തിക വര്‍ഷം അവസാനിക്കാന്‍ ഇനി അവേശേഷിക്കുന്നത് അഞ്ച് മാസം മാത്രമാണ്. ഇതിനിടക്ക് ബാക്കിയുള്ള പദ്ധതി തുക വിനിയോഗിക്കേണ്ടതുണ്ട്. അതേസമയം വാര്‍ഷിക പദ്ധതികള്‍ ജില്ലാ ആസൂത്രണ സമിതിക്ക് സമര്‍പ്പിച്ച് അംഗീകാരം വാങ്ങുന്നതിന് നേരിട്ട കാലതാമസമാണ് തുക വിനിയോഗം മന്ദഗതിയിലാകാനുള്ള കാരണമെന്നാണ് പറയപ്പെടുന്നത്. കഴിഞ്ഞ ഏപ്രില്‍ ഒന്നുമുതല്‍ ആരംഭിച്ച പദ്ധതി സമര്‍പ്പണം നിയമസഭാ തെരഞ്ഞെടുപ്പ് പെരുമാറ്റച്ചട്ടങ്ങള്‍ നിലവില്‍ വന്നതിനെ തുടര്‍ന്ന് മുടങ്ങിയിരുന്നു. പുതിയ സര്‍ക്കാര്‍ അധികാരത്തിലേറിയതിനു ശേഷം വന്ന പരിഷ്‌കരണങ്ങളും പദ്ധതി രൂപീകരിക്കുന്നതിന് താമസം നേരിട്ടിരുന്നു.    
    സംസ്ഥാനത്തെ തദ്ദേശ സ്വയംഭരണ സ്ഥാപനങ്ങളുടെ പദ്ധതിപ്രവര്‍ത്തനം കാര്യക്ഷമമാവുന്നില്ലെന്ന് നേരത്തെ ധനകാര്യ കമ്മിഷന്‍ അധ്യക്ഷന്‍ നിരീക്ഷിച്ചിരുന്നു. നടപ്പാക്കാന്‍ കഴിയുന്നതിലുമധികം പ്രൊജക്റ്റുകള്‍ ഏറ്റെടുക്കുന്നതാണ് ഇതിന് പ്രധാന കാരണമെന്നും അദ്ദേഹം പറഞ്ഞിരുന്നു.