തലശ്ശേരി: സംസ്ഥാനത്തെ പ്രധാനപ്പെട്ട സര്‍ക്കാര്‍ ആശുപത്രികളില്‍ കേന്ദ്രസഹായത്തോടെ ട്രോമാകെയര്‍ യൂനിറ്റു സ്ഥാപിക്കുമെന്നു മന്ത്രി കെ.കെ ശൈലജ. ജനറല്‍ ആശുപത്രിയില്‍ നവീകരിച്ച അത്യാഹിതവിഭാഗം ഉദ്ഘാടനം ചെയ്യുകയായിരുന്നു മന്ത്രി. കണ്ണൂര്‍, പാലക്കാട്, എറണാകുളം ജില്ലാ ആശുപത്രികളിലും കോഴിക്കോട് ഉള്‍പ്പെടെയുള്ള മെഡിക്കല്‍ കോളജുകളിലുമാണ് ആദ്യഘട്ടം ട്രോമാകെയര്‍ പദ്ധതി നടപ്പാക്കുക. ഇതിനായി സംസ്ഥാന സര്‍ക്കാര്‍ 32 കോടി രൂപ നീക്കിവച്ചു. മൂന്നുവര്‍ഷം കൊണ്ട് സര്‍ക്കാര്‍ ആശുപത്രിയുടെ മുഖച്ഛായ മാറ്റുകയാണു സര്‍ക്കാരിന്റെ നയമെന്നും മന്ത്രി ശൈലജ വ്യക്തമാക്കി.
എ.എന്‍ ഷംസീര്‍ എം.എല്‍.എ അധ്യക്ഷനായി. നഗരസഭാ ചെയര്‍മാന്‍ സി.കെ രമേശന്‍, സബ് കലക്ടര്‍ നവജ്യോത് ഖോസ, ജില്ലാ ഡപ്യൂട്ടി മെഡിക്കല്‍ ഓഫിസര്‍ ഡോ. എ.ടി മനോജ്, ആശുപത്രി സൂപ്രണ്ട് ഡോ.കെ.കെ രാജാറാം, ഡപ്യൂട്ടി സൂപ്രണ്ട് ഡോ. വി.കെ രാജീവന്‍, ഡോ. ലതീഷ്, ഡോ. പി.പി വേണുഗോപാലന്‍, മുനീര്‍ അറയിലകത്ത്, ഡോ.സി.കെ ബിന്ദു സംസാരിച്ചു. സംസ്ഥാന സര്‍ക്കാരിന്റെ ആസ്തി വികസന ഫണ്ട് ഉപയോഗിച്ച് പ്രവൃത്തി ആരംഭിച്ച ആശുപത്രിയുടെ അത്യാഹിത വിഭാഗത്തിന്റെ നവീകരണം പൂര്‍ത്തീകരിച്ചതു ബൈറുഹ ഫൗണ്ടേഷന്റെ സഹകരണത്തോടെയാണ്.