നാദാപുരം: ആളൊഴിഞ്ഞവീട്ടിലെ വാതില്‍ പൊളിച്ചു നടത്തിയ കവര്‍ച്ചയില്‍ 90,000 രൂപവിലയുള്ള വജ്രാഭരണം നഷ്ടപ്പെട്ടതായി പരാതി. ചിയ്യൂര്‍ ആലിയോട്ടു ക്ഷേത്രത്തിനു സമീപത്തു താമസിക്കുന്ന നെയ്ധ്രുവയില്‍ നടരാജന്റെ വീട്ടിലാണു കവര്‍ച്ച നടന്നത്.
നടരാജനും കുടുംബവും കഴിഞ്ഞ 23 മുതല്‍ വീട്ടില്‍നിന്നു മാറിത്താമസിക്കുകയായിരുന്നു. തിങ്കളാഴ്ച വൈകിട്ടു വീട്ടില്‍ തിരിച്ചെത്തിയപ്പോഴാണു കവര്‍ച്ച നടന്ന വിവരം അറിഞ്ഞത്. വീടിന്റെ മുന്‍ഭാഗത്തെ വാതില്‍ തകര്‍ത്താണു കവര്‍ച്ച നടത്തിയത്. വീട്ടിലെ അലമാരയില്‍ സൂക്ഷിച്ച നിലയിലായിരുന്നു ആഭരണം.
സംഭവത്തില്‍ നാദാപുരം പൊലിസ് കേസെടുത്ത് അന്വേഷണം ആരംഭിച്ചു.