ഹൈദരാബാദ്: സി.കെ നായിഡു അണ്ടര്‍ 23 പോരാട്ടത്തില്‍ കേരളത്തിനു ജയം. ഹൈദരാബാദിനെ 29 റണ്‍സിനു കീഴടക്കി കേരളം എലൈറ്റ് ഗ്രൂപ്പ് സിയില്‍ ഒന്നാം സ്ഥാനത്തെത്തി. ജയത്തോടെ കേരളത്തിനു ആറു പോയിന്റുകള്‍ ലഭിച്ചു. മൊത്തം 13 പോയിന്റുകള്‍ നേടിയാണ് കേരളം തലപ്പത്തെത്തിയത്. 197 റണ്‍സ് വിജയ ലക്ഷ്യത്തിലേക്ക് ബാറ്റു വീശിയ ഹൈദരാബാദിന്റെ പോരാട്ടം 168 റണ്‍സില്‍ അവസാനിച്ചു. അഞ്ചു വിക്കറ്റുകള്‍ വീഴ്ത്തിയ അക്ഷയ് കെ.സി, നാലു വിക്കറ്റുകള്‍ വീഴ്ത്തിയ ഫാബിന്‍ മുഹമ്മദ് എന്നിവരുടെ കണിശമായ ബൗളിങാണ് കേരളത്തിനു വിജയം സമ്മാനിച്ചത്. നേരത്തെ അക്ഷയ് ആദ്യ ഇന്നിങ്‌സിലും അഞ്ചു വിക്കറ്റുകള്‍ പിഴുത് മൊത്തം പത്തു വിക്കറ്റുകള്‍ക്കുടമയായി. ഹൈദരാബാദിന്റെ ഒന്‍പത് ബാറ്റ്‌സ്മാന്‍മാര്‍ രണ്ടക്കം കാണാതെ പുറത്തായി.
ആദ്യ ഇന്നിങ്‌സില്‍ കേരളം 235 റണ്‍സെടുത്തു. ഹൈദരാബാദിന്റെ പോരാട്ടം 145 റണ്‍സില്‍ അവസാനിപ്പിച്ച് കേരളം 90 റണ്‍സിന്റെ നിര്‍ണായക ലീഡു നേടി. രണ്ടാം ഇന്നിങ്‌സില്‍ കേരളം 107 റണ്‍സിനു പുറത്തായെങ്കിലും 197 റണ്‍സിന്റെ ലക്ഷ്യം മുന്നില്‍ വയ്ക്കാന്‍ കേരളത്തിനായി. അണ്ടര്‍ 23 എലൈറ്റ് മത്സരങ്ങളില്‍ കേരളം കരുത്തരായ മുംബൈ, ഹൈദരാബാദ് ടീമുകളെ അവരുടെ മൈതാനത്താണ് കീഴടക്കിയത്. കഴിഞ്ഞ മത്സരത്തില്‍ മുംബൈയ്‌ക്കെതിരേ കേരളം 273 റണ്‍സിന്റെ കൂറ്റന്‍ വിജയം സ്വന്തമാക്കിയിരുന്നു. ഈ മാസം ഏഴു മുതല്‍ തുടങ്ങുന്ന അടുത്ത മത്സരത്തില്‍ കേരളം മഹാരാഷ്ട്രയുമായി ഏറ്റുമുട്ടും.
 കേരള ക്രിക്കറ്റ് അസോസിയേഷന്‍ വിഭാവനം ചെയ്ത ക്യാഷ് കേരള എന്ന ദീര്‍ഘകാല പദ്ധതിയുടെ ഭാഗമായി ദേശീയ നിലവാരമുള്ള താരങ്ങളെ വളര്‍ത്തിയെടുക്കാന്‍ സാധിച്ചതിന്റെ തെളിവാണു വിജയമെന്നു കെ.സി.എ പ്രസിഡന്റ് ടി.സി മാത്യു വ്യക്തമാക്കി. അണ്ടര്‍ 19ലുള്ള രണ്ടു താരങ്ങളെ ചലഞ്ചര്‍ ട്രോഫിക്കുള്ള ദേശീയ ടീമിലേക്ക് തിരഞ്ഞെടുത്തതും കെ.സി.എയുടെ ദീര്‍ഘ വീക്ഷണത്തോടെയുള്ള നടപടികള്‍ക്ക് ഫലം നല്‍കുന്നതിന്റെ തെളിവാണെന്നും അദ്ദേഹം കൂട്ടിച്ചേര്‍ത്തു.