കല്‍പ്പറ്റ: വയനാട് ജില്ലാ പൊലിസ് സംഘടിപ്പിക്കുന്ന മൂന്ന് ദിവസം നീണ്ടുനില്‍ക്കുന്ന ബോധവല്‍കരണ ക്ലാസും ഫോട്ടോ പ്രദര്‍ശനവും കല്‍പ്പറ്റ പുതിയ ബസ്‌സ്റ്റാന്‍ഡ് പരിസരത്ത് തുടങ്ങി. പൊതുജനങ്ങളുടെയും ഡ്രൈവര്‍മാരുടെയും ഇടയില്‍ ട്രാഫിക് അവബോധം വളര്‍ത്തുക, റോഡപകടങ്ങള്‍ കുറക്കുക, റോഡ് നിയമങ്ങള്‍ പാലിക്കാന്‍ പ്രേരിപ്പിക്കുക എന്നിവയാണ് ഇതുകൊണ്ട് ലക്ഷ്യമിടുന്നത്. കെ.പി ഹരിദാസിന്റെ ചിത്രങ്ങളാണ് പ്രദര്‍ശനത്തിലുള്ളത്. ശുഭയാത്ര-ജാഗ്രത ചിത്ര പ്രദര്‍ശനവും ബോധവത്കരണ ക്ലാസും ജില്ലാ പൊലിസ് മേധാവി കെ കാര്‍ത്തിക് ഉദ്ഘാടനം ചെയ്തു. കല്‍പ്പറ്റ ഡി.വൈ.എസ്.പി കെ മുഹമ്മദ് ഷാഫി അധ്യക്ഷനായി. നാര്‍ക്കോടിക്ക് സെല്‍ ഡി.വൈ.എസ്.പി കെ.സി ഹരിഹരന്‍ സ്വാഗതം പറഞ്ഞു. വയനാട് ആര്‍.ടി.ഒ ബി മുരളീകൃഷ്ണന്‍ മുഖ്യപ്രഭാഷണം നടത്തി. നഗരസഭ ചെയര്‍പേഴ്‌സണ്‍ ബിന്ദുജോസ്, കൗണ്‍സിലര്‍ രാധാകൃഷ്ണന്‍, കെ.പി രാധാകഷ്ണന്‍, എം.വി.ഐ എസ്.പി ബിജുമോന്‍ സംസാരിച്ചു.