തിരുവനന്തപുരം: ബി.ജെ.പിയും യു.ഡി.എഫും വോട്ട് കച്ചവടം നടത്തിയിട്ടില്ലെങ്കില്‍ എല്‍.ഡി.എഫ് 100 സീറ്റ് നേടുമെന്ന് പ്രതിപക്ഷ നേതാവ് വി.എസ് അച്യുതാനന്ദന്‍. എല്‍. ഡി.എഫിന് വോട്ടുചെയ്ത എല്ലാവര്‍ക്കും അദ്ദേഹം 
ഫേസ്ബുക്ക് പോസ്റ്റിലൂടെ  നന്ദിയറിയിച്ചു.

പോസ്റ്റിന്റെ പൂര്‍ണരൂപം

നന്ദി

തെരഞ്ഞെടുപ്പ് പെരുമാറ്റ ചട്ടങ്ങള്‍ പാലിക്കുന്നതിന് വേണ്ടിയാണ് ഔദ്യോഗികമായി പ്രചാരണം അവസാനിച്ചതിന് ശേഷം സാമൂഹികമാധ്യമങ്ങളില്‍ നിന്നും മാറി നിന്നത്. ഇന്ന് മുതല്‍ വീണ്ടും സജീവമാവുകയാണ്.

ഈ തെരഞ്ഞെടുപ്പില്‍ സമ്മതിദാനാവകാശം വിനിയോഗിച്ച മുഴുവന്‍പേരെയും ഞാന്‍ അഭിവാദ്യം ചെയ്യുന്നു. ജനാധിപത്യത്തിലെ ഏറ്റവും വലിയ അവകാശവും ആയുധവുമാണല്ലോ വോട്ട്. അത് കേരളീയര്‍ ശരിയായ വിധത്തില്‍ വിനിയോഗിച്ചു എന്ന സൂചന നല്കുന്ന എക്‌സിറ്റ് പോള്‍ ഫലങ്ങളാണ് പുറത്തുവന്നിട്ടുള്ളത്.

ബി.ജെ.പിയും യു.ഡി.എഫ്. ഉം വോട്ട് കച്ചവടം നടത്തിയിട്ടില്ലെങ്കില്‍ തെരഞ്ഞെടുപ്പിന്റെ തുടക്കത്തില്‍ ഞാന്‍ പ്രഖ്യാപിച്ചതു പോലെ 100 സീറ്റ് എന്ന ലക്ഷ്യത്തിലേയ്ക്ക് എല്‍.ഡി.എഫ്. എത്തിചേരാവുന്ന സാഹചര്യങ്ങളാണ് നിലവിലുള്ളത്.

അതിനായി പ്രയന്തിച്ച മുഴുവന്‍ എല്‍. ഡി.എഫ് പ്രവര്‍ത്തകരെയും അഭിനന്ദിക്കുന്നതിനൊടൊപ്പം വോട്ടവകാശം വിനിയോഗിച്ച മുഴുവന്‍ ജനാധിപത്യവിശ്വാസികള്‍ക്കും നന്ദിയും രേഖപ്പെടുത്തുന്നു.